Ballkani ka vazhduar me fitore në elitën e futbollit kosovar.
Skuadra e drejtuar nga Ismet Munishi ka triumfuar lehtësisht në Therandë me rezultat 4-1 ndaj Besës së Pejës.
Ballkani dominoi nga fillimi i ndeshjes, teksa golin e parë e gjeti në minutën e 26-të.
Arbër Potoku depërtoi bukur në zonë dhe u pengua nga Etnik Brruti, kurse nga penalltia për 1-0 realizoi Mirlind Daku.
Vetëm tre minuta më vonë, Daku përsëri gjeti golin kur shënoi nga afërsia për 2-0.
Me epërsinë e dyfishtë të Ballkanit përfunduan edhe 45 minutat e para të kësaj sfide.
Në pjesën e dytë Besa u ngjall në fushë, teksa ngushtuan epërsinë në 2-1 kur në minutën e 70-të realizoi Donat Sheqerolli.
Por 10 minuta më vonë, Meriton Korenica realizoi një gol të bukur për ta ngritur epërsinë në 3-1.
Ballkani vazhdoi me dominim të ndeshjes, ku krejt në fund mbrojtësi Egzon Sinani realizoi për rezultatin përfundimtar 4-1.
Ballkani vazhdon kryesimin edhe pas xhiros së 10-të, teksa ka grumbulluar 25 pikë.
Në anën tjetër Besa mbetet e fundit në tabelë me vetëm pesë pikë pas 10 xhirove. /Telegrafi/
