Curry bojkoton presidentin Trump: Nuk shkoj në shtëpinë e bardhë

Do të duhej të ishte dita e parë e shkollës për Golden State Warriors që u prezantua përpara mediave për nisjen e përgatitjeve të sezonit të ri, por mjaftoi shumë pak që të kthehej në një ditë polemikash që kulmuan me njoftimin e kampionëve për të mos marrë pjesë në pritjen e Shtëpisë së Bardhë.

Njoftimin e bëri vetë ylli i kësaj skuadre, Steph Curry, i cili theksoi se do të bojkotojë ceremoninë e presidentit Trump.

“Unë nuk dëshiroj të shkoj në Shtëpinë e Bardhë”, deklaroi vendosur Curry duke shtuar se nuk ka ndryshuar mendje.

Në vijim ai qartësoi edhe pozicionin e gjithë skuadrës që planifikon ta bojkotojë ceremoninë edhe pse nuk ka ende një vendim zyrtar.

“I kam idetë shumë të qarta në kokën time dhe shpresoj që ky të jetë një sinjal për të bërë ndryshimin. Ajo që presidenti im i thotë botës por edhe sjellja e tij, nuk më pëlqejnë aspak. Nëse do të votojmë, atëherë vota ime është jo”, tha gjithashtu Curry.

Gjithsesi, në fjalën e tij, drejtori i përgjithshëm Bob Myers u shfaq më diplomatik në sjelljen e tij duke saktësuar se nuk është marrë ende një vendim dhe gjithçka do të bëhet e ditur në momentin e duhur.

Për të prezantuar skuadrën e sezonit të ri mendoi trajneri Steve Kerr duke paralajmëruar një sezon më të ashpër pas merkatos së bërë nga Oklahoma dhe Houston.