CR7, sa rekorde do të arrijë ky njeri

Me het-trikun e shënuar brenda tetë minutash në ndeshjen kundër Granadas, Cristiano Ronaldo preku disa rekorde të reja.

Superylli i Real Madridit ka barazuar rekordin me legjendën Alfredo Di Stefano dhe superyllin e Barcelonës, Lionel Messi.

Në triumfin prej 9-1, ky ishte tregolëshi më i shpejtë në karrierën e CR7 dhe më i shpejti i shënuar nga ndonjë lojtar jospanjoll i Realit në La Liga, ndërkaq ishte het-triku i 28-të i CR7 për Los Blancos në të gjitha garat, po aq sa ka shënuar edhe Di Stefano.

Njëherësh, ky ishte het-triku i 24 i tij në La Liga, po aq sa ka shënuar edhe rivali i tij kryesor, Leo Messi, në kampionatin spanjoll.

Pos tre golave në pjesën e parë, 30-vjeçari shënoi edhe dy të tjerë në pjesën e dytë e që ishte hera e parë në karrierë që shënon pesë gola brenda një ndeshjeje.

Atij i nevojitet edhe një gol për të arritur shifrën prej 300 golash në të gjitha garat me Mbretërit, ndërsa këtë edicion në 41 ndeshje ka shënuar 47 gola në të gjitha garat.

Ndërkohë që Ronaldo tashmë ka arritur shifrën prej 300 golash të shënuara në ligat ku ka luajtur – 213 në La Liga (Real Madrid), 84 në Liga Premier (Manchester United) dhe tre në Primeira Liga (Sporting Lisbon).

Kjo ishte hera e tretë në histori të Real Madridit që shënonte nëntë gola në një ndeshje, ndërsa hera e fundit ka qenë në vitin 1967 kundër Real Sociedadit (9-1). /Telegrafi/