Çollaku: Demarkacioni duhet të ratifikohet deri në korrik (Video)

Marrëveshja për shënjimin e kufirit ndërmjet Kosovës dhe Malit të Zi duhet të ratifikohet në Kuvend, më së largu deri nga muaji i fundit qershor, apo fillimi i muajit korrik. Vonesa e rrezikon seriozisht procesin e lëvizjes së kosovarëve pa viza, thotë ministri i Integrimit Evropian, Bekim Çollaku.

“Duhet të jemi shumë të qartë dhe tepër transparentë me qytetarët e Kosovës. Çështja e demarkacionit ka qenë një kërkesë që nga fillimi i liberalizimit të vizave dhe nuk është diçka e re ashtu siç po thuhet nga disa palë të përfshira në këtë proces”, tha ministri. “Komisioni Evropian edhe pas dhënies së rekomandimit për liberalizim të vizave, e ka bërë të qartë që Kosova deri në momentin e vendimmarrjes përfundimtare duhet patjetër ta bëjë ratifikimin e kësaj marrëveshjeje dhe njëkohësisht të dëshmojë edhe më tepër vullnet në luftën kundër krimit të organizuar dhe korrupsionit. Dhe, këto janë dy kushte, dy kritere, të cilat i ka lënë të hapura dhe si të domosdoshme për t`i implementuar derisa nuk fillon zbatimi praktik i lëvizjes pa viza”. /ekonomiaonline/