CIA: Vetëmbrojtja dhe frikësimi, synim i programit bërthamor të Phenianit

Drejtori i CIA-së, Mike Pompeo, tha të martën se programi raketor dhe bërthamor i Koresë së Veriut nuk është i projektuar vetëm për vetëmbrojtje, por edhe për frikësim.

“Mund ta quani shtrëngues”, tha Pompeo në një aktivitet të organizuar në Uashington nga organizata konservatore, Instituti ‘American Enterprise’.

Gjithashtu Pompeo tha se CIA beson se udhëheqësi i Koresë së Veriut, Kim Jong Un, do të përdorte armët bërthamore jo vetëm për të ruajtur pushtetin, por edhe si kërcënim për ribashkimin e Gadishullit të ndarë të Koresë nën regjimin e tij autokratik.

Ai shtoi se Pheniani është më pak se një vit larg rrezikimit të amerikanëve dhe tha se lëvizja tjetër e dukshme e vendit do të ishte zhvillimi i aftësive për të hedhur raketa të shumta në të njëjtën kohë.

“Hapi i ardhshëm logjik do të ishte zhvillimi i një arsenali armësh që është i aftë të lëshojë jo vetëm një raketë ose të shërbej si një demonstrim forceje, por aftësia për të hedhur raketa të shumta në të njëjtën kohë”, tha Pompeo.

Drejtori i CIA-së, tha se Presidenti amerikan Donald Trump është i përqendruar në gjetjen e një zgjidhjeje diplomatike për krizën e Koresë së Veriut, por CIA po punon për t’i dhënë atij një sërë alternativash të tjera.

Koreja e Veriut ka zhvilluar në mënyrë agresive programet e saj të armëve bërthamore dhe balistike në kundërshtim me sanksionet ndërkombëtare. /Zëri Amerikës /Telegrafi/