Trajneri i Paris Saint-Germain, Luis Enrique, mund të përballet me një pezullim nga të gjitha aktivitetet si trajner, pasi goditi me shuplakë lojtarin e Chelseat, Joao Pedro, pas finales së Kupës së Botës për Klube të dielën.
Incidenti ndodhi pas humbjes 3–0 të PSG-së ndaj Chelseat dhe shkaktoi një përleshje masive, ku morën pjesë mbi 20 lojtarë dhe anëtarë të stafit të të dyja skuadrave.
FIFA pritet të hapë një hetim për ngjarjen, por nuk mund të shqiptojë menjëherë një pezullim ndeshjesh për Enrique, pasi PSG nuk do të luajë më në një garë të FIFA-s deri në Kupën Ndërkontinentale të dhjetorit.
Një masë disiplinore e vonuar, e ngjashme me pezullimin e Luis Suarez për kafshimet në vitin 2014, është opsioni më i mundshëm.
Kjo mund ta ndalojë Enriquen të stërvisë ekipin në ndeshjet e ardhshme, edhe pse ato nuk janë në kompetencat e FIFA-s.
Luis Enrique u përpoq ta minimizonte incidentin duke pretenduar se thjesht po përpiqej të ndante lojtarët në një moment tensioni dhe fajësoi pjesërisht trajnerin e Chelseat, Enzo Maresca, për situatën.
Nga ana tjetër, Joao Pedro deklaroi se ishte duke mbrojtur shokun e skuadrës, Andrey Santos, kur u përfshi në përplasjen me lojtarët e PSG-së.
FIFA ende nuk ka konfirmuar nëse ka hapur një procedurë zyrtare disiplinore ndaj Luis Enrique. /Telegrafi/
