Çfarë mund të nënkuptojë vendimi i Bidenit për pjesën tjetër të botës?

Udhëheqësit perëndimorë e kanë lavdëruar Joe Biden për përpjekjet e tij për të forcuar demokracitë kundër rritjes së fuqive autoritare, pasi ai u largua nga gara presidenciale në SHBA.

Por, padyshim që do të ketë “ankth” pas dyerve të mbyllura se si largimi tij mund të vendosë Donald Trumpin përsëri në krye të shtetit.

Drama, e cila po dominon politikën e brendshme të SHBA-së, kishte filluar të bëhet pjesë edhe e ngjarjeve kryesore botërore, duke përfshirë samitin e NATO-s në Uashington, ku i paharruar mbetet momenti kur Biden gabimisht prezantoi presidentin e Ukrainës, Volodymyr Zelenskyn, si “presidenti Putin”.

Tani fokusi do të zhvendoset te personi që do të zëvendësojë Bidenin në listën e demokratëve, megjithëse kushdo që do të marrë këtë rol nuk ka gjasa të paralajmërojë ndonjë ndryshim të rëndësishëm në qasjen e SHBA-së ndaj çështjeve ndërkombëtare.

Kjo përfshin edhe zëvendëspresidenten e tij, Kamala Harris, shkruan skynews, përcjell Telegrafi.

Për luftën e Rusisë në Ukrainë, ajo ka mbështetur fuqishëm qëndrimin e presidentit për të armatosur ushtrinë ukrainase.

Harris ka luajtur një rol të spikatur në pozicionimin e SHBA-së në skenën botërore, si zëri më i lartë i SHBA-së në një konferencë vjetore të sigurisë në Mynih të Gjermanisë.

Sa i përket luftës së Izraelit kundër Hamasit në Gazë, Harris ka shkuar më tej se presidenti në thirrjen për një armëpushim, duke shprehur tmerrin për numrin civilëve të vdekur palestinezë.

Megjithatë, SHBA-ja e udhëhequr nga Biden-Harris ka ruajtur mbështetjen ushtarake për Izraelin.

Siç raportohet, kryeministri izraelit, Benjamin Netanyahu, do të udhëtojë në Uashington për t’u takuar me presidentin në largim, i cili ka qenë një mbështetës i vendosur i Izraelit përgjatë dekadave.

“Kjo do të jetë një mundësi për ta falënderuar atë për gjërat që ka bërë për Izraelin, si senator, zëvendëspresident dhe president”, tha Netanyahu.

“Do të jetë gjithashtu një mundësi e mirë për të diskutuar me të për muajt kritikë dhe qëllimet e dy vendeve, në këtë kohë lufte dhe pasigurie”, shtoi ai.

Aleatëve të SHBA-së do t’ju mungojë thellësia e njohurive të Bidenit

Biden – ndryshe nga Harris ose ndonjë nga kandidatët e tjerë të mundshëm të demokratëve – ka një interesim të madh në punët e jashtme dhe ka krijuar marrëdhënie të gjata me liderët në mbarë botën.

Ai ka një thellësi njohurish, diçka që aleatëve ka të ngjarë t’iu mungojë.

Një tipar përcaktues i politikës së jashtme të Shtëpisë së Bardhë të Bidenit ka qenë vendosmëria e tij për të rivendosur lidhjet midis SHBA-së dhe partnerëve të saj më të afërt – veçanërisht aleancës së NATO-s – që ishin tensionuar gjatë kohës kur në pushtet ishte Trumpi.

“Amerika u kthye” ishte slogani që Biden e përdorte shpesh gjatë muajve të tij të parë në detyrë, duke e bërë të qartë se puna me aleatët perëndimorë kundër shteteve autoritare si Kina, Rusia, Irani dhe Koreja e Veriut ishte një prioritet kryesor.

Ky qëndrim ka të ngjarë të qëndrojë i njëjtë edhe nën Harris.

Ndryshimi i madh – i cili do të ketë një ndikim shumë më të rëndësishëm në pjesën tjetër të botës – nuk është se kush është kandidati i demokratëve tani që Biden është larguar, por nëse humbasin, çfarë do të thotë kjo për vendin dhe miqtë e SHBA-së. /Telegrafi/