Botë Nga Bota Azia

Çfarë kanë thënë Izraeli dhe Hamasi për çështjen e gjenocidit në Gjykatën Ndërkombëtare të Drejtësisë?

Para 1 viti

Sot shënon një ditë të rëndësishme në konfliktin mes Izraelit dhe Hamasit, ku Gjykata Ndërkombëtare e Drejtësisë do të vendos rreth një kërkesë për vendosjen e masave emergjente në Gaza.

Vendimi do të vijë si pjesë e një çështjeje më të madhe të ngritur nga Afrika e Jugut, e cila akuzon Izraelin për kryerje të gjenocidit në Rripin e Gazës, raporton skynews.

Ndërsa vendimet e gjykatës janë ligjërisht të detyrueshme dhe nuk mund të apelohen, ajo nuk ka asnjë mekanizëm që të detyrojë palën humbëse t’i zbatojë ato.

Në vend të kësaj, përgjegjësia për t’i zbatuar ato i takon komunitetit ndërkombëtar, transmeton Telegrafi.

Çfarë ka thënë Izraeli?

Historikisht, Izraeli ka refuzuar të angazhohet në gjykatat ndërkombëtare, por këtë herë dërgoi një ekip ligjor për të mbrojtur veten në Hagë.

Ai e përshkroi Afrikën e Jugut si “hipokrite” dhe padinë si ” blood libel” – një term i përdorur për akuzat e rreme antisemitike kundër popullit hebre që e ka origjinën nga Mesjeta.

Dje, zëdhënësi i qeverisë izraelite, Eylon Levy tha se Izraeli pret që gjykata ta hedhë çështjen, “këto janë akuza të rreme”.

Në fillim të këtij muaji, kryeministri i Izraelit ka ritheksuar se vendi i tij do të vazhdojë me ofensivën në Gaza derisa të shkatërrojë Hamasin dhe të sjellë në shtëpi të gjithë pengjet.

Benjamin Netanyahu tha se “askush nuk do të na ndalojë, as Haga, as boshti i së keqes dhe askush tjetër”.

Çfarë ka thënë Hamasi?

Grupi ka thënë se do t’i bindet vendimit të GJND-së, për sa kohë që të reagojë Izraeli.

Zyrtari i lartë i Hamasit, Osama Hamdan tha se do të lironte të gjithë pengjet izraelitë në Gaza nëse Izraeli liron të gjithë të burgosurit palestinezë.

Ndryshe, Gjatë dhënies së vendimit, 17 gjyqtarë, 15 prej të cilëve janë të përhershëm, plus një nga Republika e Afrikës së Jugut dhe Izraeli – duhet t’i përgjigjen dy pyetjeve.

Së pari, a e ka përmbushur Republika e Afrikës së Jugut kushtin bazë që tregon se pretendimi i saj kundër Izraelit mund të trajtohet sipas Konventës së OKB-së për gjenocidin e vitit 1948. Konventa e nënshkruar nga Izraeli dhe Republika e Afrikës së Jugut, e cila përcakton se çfarë është gjenocidi. Në këtë fazë paraprake të çështjes, shiriti është relativisht i ulët.

Së dyti, a ka një rrezik të mundshëm të dëmit të pariparueshëm për popullin palestinez në Gaza nëse vazhdojnë veprimet ushtarake izraelite. Gjithashtu, gjyqtarët nuk janë të kufizuar në kërkesat specifike të Republikës së Afrikës së Jugut. Diskutimi thjesht mund ta udhëzojë Izraelin që të sigurojë që veprimet e tij janë në përputhje me ligjin ndërkombëtar dhe të sigurojë që ai të mos bëjë asgjë për të parandaluar dërgimin e ushqimit, ujit ose ilaçeve. /Telegrafi/