Çdo klub do të kishte nevojë për një lojtar si Gerard Pique – mbrojtësi në çdo kohë i gatshëm të bëjë sakrifica të mëdha për Barcelonën

Gerard Pique është gjithmonë aty kur Barcelona ka nevojë për të, duke mos e vënë asnjëherë në dyshim ndjenjën e madhe që ka për klubin.

Ai e ka treguar një mijë herë këtë gjë në fushën e lojës, madje duke luajtur edhe kur nuk ishte fizikisht 100 për qind, por edhe jashtë fushës, sidomos kohët e fundit.

Më poshtë janë të renditura faktet, duke filluar nga ai kur e afroi sponsorin kryesor të klubit, deri te oferta që ai të luante pa para vetëm që të regjistrohen lojtarët.

600 games 💙❤️ @FCBarcelona pic.twitter.com/US8uA6ETWs

— Gerard Piqué (@3gerardpique) March 13, 2022

Sponsori kryesor i Barcelonës erdhi nga ai

Ndihma e parë e madhe nga mbrojtësi katalan edhi ishte kur klubi i Barcelonës mbeti pa sponsorizimin e Katarit për shkak të vështirësive që lindën për rinovimin e kontratës.

Barça po kërkonte një sponsor tjetër që mund të paguante shifra të ngjashme dhe ishte e vështirë të gjente një të tillë. Më pas ‘biznesmeni’ Pique u shfaq në lojë, duke gjetur një zgjidhje.

Ai e njihte Hiroshi Mikitanin, pronarin e Rakuten dhe ishte ndërmjetësi që klubi dhe kompania japoneze të nënshkruanin një marrëveshje sponsorizimi për katër vjet. Marrëveshja i dha Barcelonës plot 55 milionë euro në vit, plus një bonus prej 1.5 milion euro nëse e fitojnë La Liga dhe 5 milionë euro të tjera nëse do të fitonte Ligën e Kampionëve.

Rakuten u bë sponsori kryesor i klubit dhe kjo ishte pjesërisht falë Piques dhe këtë e ka pranuar edhe ish presidenti i FC Barcelona, ​​Josep Maria Bartomeu, kur u prezantua marrëveshja.

Heqja dorë nga paga dhe regjistrimi i lojtarëve

Verën e kaluar, Barça kishte probleme edhe me ‘fair play financiar’ dhe nuk mund të regjistronte lojtarët.

Më 14 gusht 2021, vetëm një ditë para fillimit të kampionatit kundër Real Sociedad dhe pak para konferencës për shtyp të Ronald Koeman, klubi lëshoi ​​deklaratën ku shkruante:”FC Barcelona ka mundur të regjistrojë Memphis, Eric Garcia dhe Rey Manaj në Liga Profesionale të Futbollit. Ky fakt është bërë i mundur falë marrëveshjes së arritur me Gerard Piqué, ku kapiteni i dytë i Barcelonës ka pranuar një pagë dukshëm më të ulët”.

Edhe këtë sezon ndodhi e njëjta gjë, madje ofroi të luante falas

Edhe këtë sezon po ndodh saktësisht e njëjta gjë. Mbrojtësi i ka dalë edhe një herë në ndihmë klubit dhe ka qenë sërish i pari që ka ofruar të gjitha lehtësitë në mënyrë që Barça të regjistrojë të gjitha nënshkrimet që janë bërë këtë verë.

Pique ka rënë dakord me bordin e drejtorëve që të mos marr bonusin e pagës që do t’i korrespondonte me kontratë pas zgjatjes që ai nënshkroi deri në vitin 2024 gjatë mandatit të Bartomeu, kur ai kishte rënë dakord për një “shtyrje rroge”.

Qendërmbrojtësi do të rikthehet në kushtet që kishte para zgjatjes, duke ruajtur kohëzgjatjen e kontratës deri në vitin 2024. Sipas gazetës AS, ai ka ofruar të luajë falas, gjest që klubi nuk e ka pranuar. Gjatë viteve të fundit, Pique ka falur një shumë të konsiderueshme parash që i takonin me kontratë.

Dëshira e tij për të qenë president i FC Barcelona

Gerard Pique nuk e ka fshehur kurrë se në të ardhmen do të dëshironte të ishte president i Barcelonës.

“Unë jam shumë i dashur dhe do të doja të ndihmoja klubin e dashurive të mia”.

“Kjo bëhet duke qenë shumë i përgatitur për të mbajtur këtë pozicion nëse mendoj se mund të kontribuoj. Është diçka që e kam dashur gjithmonë”, ka thënë ai.

Pique njihet edhe si biznesmen, pasi ka shumë projekte biznesi me kompaninë e tij Kosmos, por duket se dëshira afatgjate është që një ditë të plotësojë edhe ëndërr e tij, të jetë në krye të klubit që i dha gjithçka. /Telegrafi/