Çdo i katërti banor, i huaj në Zvicër – shtetasit e Kosovës në vendin e pestë

Banorët e huaj tani përfaqësojnë më shumë se një të katërtën e popullsisë në Zvicër, sipas të dhënave të lëshuara nga Zyra Federale e Statistikave, megjithëse, numri i emigrantëve të rinj që vijnë po bie, shkruan “The Local”.

Deri në fund të vitit 2017 kishte 2.13 milionë shtetas të huaj në Zvicër nga 8.48 sa jetojnë në përgjithësi, duke përbërë 25.1 për qind të të gjithë banorëve, përcjell albinfo.ch.

Shumica e banorëve të huaj janë evropianë, me italianët që përbëjnë grupin më të madh të ndjekur nga gjermanët dhe portugezët e francezët.

Në vendin e pestë ndodhen shqiptarët e Kosovës me 5.2 % të huajve në Zvicër. Shqiptarët ndiqen nga spanjollët, turqit dhe serbët.

Më shumë se gjysma e banorëve të huaj kanë lindur në Zvicër ose kanë jetuar të paktën dhjetë vjet.

Ndërkohë të sapoardhurit janë në rënie në Zvicër. Rreth 171,000 të huaj u zhvendosën në Zvicër vitin e kaluar, rreth 20,000 më pak se në vitin 2016. Afër 45,000 njerëz u bënë shtetas të Zvicrës gjatë vitit të kaluar.