Me Buffonin në portë dhe Neymarin protagonist, PSG e nis mbarë sezonin e ri

Paris Saint-Germaini e ka nisur me fitore edicionin e ri në kampionatin francez, Ligue 1. Në ndeshjen e parë sezonale, kampioni në fuqi luajti kundër Caen, skuadër të cilën e mposhti me rezultat 3-0.

Pas një topi të dhënë keq nga portieri mysafir, Christopher Nkunku asistoi te Neymar, i cili e zhbllokoi rezultatin (10′).

https://www.dailymotion.com/video/x6rwcj9

Nikoqirët e realizuan edhe golin e dytë në pjesën e parë. Angel di Maria u tregua fantastik në krahun e djathtë dhe pasoi te Adrien Rabiot, i cili nuk e pati të vështirë të shënonte në portën e zbrazët (35′).

Me epërsinë e dyfishtë të parisienëve, skuadrat shkuan në pushim, pasi në minutat e mbetura të fraksionit të parë nuk pati ndonjë rrezik të madh në asnjërën portë.

Di Maria vazhdoi të krijonte raste në gjysmën e dytë, ndërkohë që PSG e kontrollonte lojën dhe e ruante avantazhin.

Pas një gabimi të portierit Brice Samba, Timothy Weah nuk e pati të vështirë ta shënonte edhe golin e tretë të vendasve (89′).

https://www.dailymotion.com/video/x6rwfat

Kylian Mbappe e Edinson Cavani nuk u paraqitën në këtë ndeshje, ndërsa portieri legjendar Gianluigi Buffon startoi nga minuta e parë në portën e PSG-së. /Telegrafi/