Brozovic sërish i hidhëroi mbështetësit e Interit, trajneri i dërgon mesazh të qartë (Foto)

Mesfushori i Interit, Marcelo Brozovic, në javët e fundit ka qenë jashtë planeve të trajnerit Frank de Boer për shkak të mungesës së disiplinës.

Kjo ka bërë që të humbë disa ndeshje, mirëpo pasi u kërkoi falje bashkëlojtarëve dhe trajnerit, holandezi e ktheu në skuadër që të konkurronte për një vend për ndeshjen ndaj Romës.

Mirëpo, ai ka bërë një tjetër veprim që i ka hidhëruar mbështetësit e Interit, kur pas humbjes së Nerazzurrëve nga Sparta në Ligën e Evropës, Brozovic publikoi një fotografi ku shfaqej në shoqërinë e një biondeje atraktive.

“Derisa Interi ka probleme serioze, ty të kujtohen ‘selfiet’!”; Shkëlqyeshëm! Humbëm, kurse çfarë bën ti! Gjithçka pozitive që kanë menduar për ty tifozët e Interit, tashmë është zhdukur”; “E shoh se je i zhgënjyer dhe i thyer që je jashtë skuadrës për dy javë” – ishin disa prej komenteve.

Për këtë shkak, edhe De Boer i ka paralajmëruar lojtarët që të kenë kujdes çfarë dhe kur të publikojnë në rrjetet sociale.

Lexo po ashtu Zanetti: Brozovic nuk e respektoi Interin

“Jo vetëm Brozovic, të gjithë lojtarët e mi duhet ta kuptojnë sa të rëndësishme janë rrjetet sociale, por edhe të rrezikshme. Duhet ta kuptojnë se kur mund ta shfrytëzojnë Instagramin dhe Facebookun”.

“Në këtë moment, sipas mendimit tim, nuk është mirë të përdoren. P.sh., portieri i Ajaxit e publikoi një fotografi në mes të ndeshjes. Ky padyshim se nuk është moment i mirë. Lojtarët duhet të jenë të fokusuar, pavarësisht se kush është kundërshtari”, ka deklaruar trajneri. /Telegrafi/