Brazili kualifikohet, Zvicra zhvillon sfidën vendimtare në raundin e fundit

Brazili e ka regjistruar edhe fitoren e dytë në Grupin G duke e mposhtur Zvicrën me rezultat 1-0 në raundin e dytë të fazës grupore në Kampionatin Botëror që u zhvillua në Stadium 974 në Doha.

Të dyja skuadrat ishin mjaft të kujdesshme në fraksionin e parë të lojës, në veçanti Helvetikët, të cilët nuk dëshironin të pranojnë gol.

Vinicius Junior pati ndër rastet më të mira në 45 minutat e parë, por intervenimi i Yann Sommer ishte vendimtar.

Rrjetat mbetën të paprekura kur gjyqtari dha shenjë që ekipet të shkonin në pushim, ndërsa një lojë më dinamike u aplikua në gjysmën e dytë.

Një pasim i mençur i Casemiros në këmbët e Vinicius, i mundësoi sulmuesit të Real Madridit të bënte një lëvizje të bukur dhe ta dërgonte topin në rrjetë (64’).

Megjithatë, pas konsultimit të VAR-it, goli u anulua për pozitë jashtë loje gjatë ndërtimit të aksionit.

View this post on Instagram

A post shared by Telegrafi Sport (@telegrafisport)

Përpjekjet e Selecaos për të realizuar u kompletuan me golin e avantazhit (83’). Rodrygo asistoi te Casemiro dhe mesfushori i Manchester Unitedit realizoi gol të bukur.

Pas kësaj fitoreje, Brazili ngjitet në kuotën e gjashtë pikëve dhe tashmë është kualifikuar në 1/8 e finales në Kampionatin Botëror. Zvicra do ta kërkojë kualifikimin në raundin e fundit, në të cilin duhet ta nënshtrojë Serbinë. /Telegrafi/