Yjet e Borussia Dortmund, Erling Haaland dhe Jadon Sancho janë ndër emrat e paraqitur në listën e tetë personave të klubit nga Bundesliga që mund të shiten pas përfundimit të sezonit aktual.
Sancho, 20 vjeç, ishte i lidhur shumë me Manchester Unitedin verën e kaluar dhe mund të tërheqë edhe një herë interesin e Djajve të Kuq nëse Dortmund shtyn përpara me shitjen e tij.
Haaland gjithashtu ka qenë i lidhur me Unitedin, por sulmuesi 20-vjeçar norvegjez ka tërhequr interes edhe nga Chelsea, Manchester City dhe Liverpool.
Dortmundi gati ta shesë Haalandin për të fituar sa më shumë para, alarmohen klubet e mëdha evropiane
Dortmund ka luftuar në kampionatin gjerman këtë sezon dhe mund të humbasë futbollin e Ligës së Kampionëve sezonin e ardhshëm.
Kështu, klubi gjerman po vlerëson mundësinë e shitjes së disa lojtarëve yje të ekipit për të mbledhur fonde.
Sipas mediumit gjerman WAZ, Haaland dhe Sancho janë në listë së bashku me Jude Bellingham, i cili u nënshkrua nga Birmingham për një tarifë fillestare prej 25 milionë funtesh verën e kaluar.
Emrat e tjerë të paraqitur në listën e shitjeve përfshijnë edhe Axel Witsel, Manuel Akanji, Raphael Guerreiro, Giovanni Reyna dhe Mahmoud Dahoud.
Dortmundi aktualisht është i gjashti në kampionatin gjerman dhe ka mbetur 16 pikë prapa liderëve të Bundesligës, Bayern Munich.
Raportet e fundit kanë sugjeruar që Dortmund mund të ulë për 20 milionë funte çmimin e tyre të kërkuar për Sanchon. /Telegrafi/
