Ndaj kësaj metode të përdorur nga doganat kanë reaguar bizneset, të cilat nëpërmjet Odës Ekonomike Amerikane në Kosovë (OEAK) kanë kërkuar nga doganat të rishikojë praktikat e mospranimit të vlerave të cilat i paraqesin kompanitë importuese në kufi.
Por, sipas doganierëve, të cilët janë përgjigjur nëpërmjet Fllanza Mezinit, asistente e drejtorit të përgjithshëm të Doganave të Kosovës, një gjë e tillë ende nuk është e mundur. “Ne vazhdimisht punojmë në trajnimin e stafit tonë, por edhe edukimin e taksapaguesve që të deklarojnë në mënyrë të drejtë. Një mundësi shumë e mirë që tani ekziston është edhe verifikimi i të dhënave tek vendet eksportuese, për çka Dogana e Kosovës po punon në drejtim të arritjes të sa më shumë marrëveshjeve bilaterale për shkëmbim të të dhënave me doganat e vendeve eksportuese”, ka pohuar Mezini.
Sipas raportit për vitin 2010, Dogana ka vlerësuar se 25 për qind e dokumenteve të dorëzuara kanë qenë joreale. Megjithatë, i njëjti raport dëshmon se këto rivlerësime kanë “ngarkuar” biznesin për vetëm 4 për qind të të hyrave të gjithëmbarshme që ka grumbulluar dogana, që do të thotë se 96 për qind e të hyrave janë grumbulluar nga deklarimi vullnetar, shkruan Koha Ditore.“Për të dëshmuar një gjë të tillë po ju japim të dhënat aktuale të të hyrave. Deri në ditën e djeshme janë grumbulluar 624 milionë euro, që paraqet 17.10 për qind më shumë të hyra se gjatë vitit të kaluar”, thotë Mezini.
Në dokumentin e fundit të OEAK-ut, “Agjenda e Biznesit të Kosovës 2011”, thuhet se bizneset kanë deklaruar se zyrtarët doganorë janë nën presion të Qeverisë për të rritur të hyrat buxhetore, dhe ata e shohin këtë si një prej mënyrave për shtimin e të hyrave. Por, sipas doganierëve kjo nuk qëndron. Bizneset janë ankuar se as mallrat e blera me zbritje nuk mund t’i deklarojnë në dogana. Edhe kjo mohohet nga vetë doganierët. /Telegrafi/
