Bislimi lavdëron Raportin e Komisionit Evropian: Ndër më të mirët ndonjëherë për Kosovën

Zëvendëskryeministri i Kosovës, Besnik Bislimi, ka thënë se Raporti i Komisionit Evropian për vitin 2022, është ndër më të mirët ndonjëherë për Kosovën dhe ndër më të mirët në rajonin e Ballkanit Perëndimor.

Bislimi, përmes një postimi në Facebook, ka njoftuar se në diskutimin e tij në kuadër të diskutimit në tryezën “Agjenda Evropiane 2022” ka folur  mbi të arriturat e evidentuara në raportin për vendin 2022 të Komisionit Evropian.

Duka folur për Raportin e progresit të Komisionit Evropian, Bislimi ka thënë se “raporti fillon me theksimin e stabilitetit politik”.

“Tregon se Qeveria është gjetur e përgatitur për të përballuar më së miri situatat të cilat kanë ardhur si ndikim nga jashtë. Raporti tregon edhe se Qeveria ka patur qasje të mirë dhe ka treguar maturitet fiskal në këto periudha, për t’i rezistuar masave populiste, ku raporti i Komisionit Evropian evidenton si shembull rastin e tërheqjes së trustit”, ka shkruar Bislimi, transmeton, Telegrafi.

Sipas tik, është gjithashtu dhe dyfish më i rëndësishëm krahasimi i planit operativ, kur vendi përballet me sfida si pandemia, kriza energjetike dhe inflacioni.

“Për herë të parë, raporti për vendin është konservativ për ndërhyrjet politike, pra nuk ka vlerësim ku thuhet që ka ndërhyrje apo vullnet për ndërhyrje politike në institucionet publike”.

Më tej, ai thotë se “në një vit, Qeveria i ka dhënë zgjidhje problemeve që kanë ekzistuar për vite me radhë dhe që kanë qenë kërkesa të vetë BE. Terminali doganor, ligji për financimin e partive politike, racionalizimi i agjensive janë vetëm disa prej shembujve të shumta”.

“Gjithashtu, përveç hartimit të strategjive, është vlerësuar puna në kriteret ekonomike si rimëkëmbja, formalizimi i vendeve të punës si dhe ulja e deficitit”.

Bislimithotë se tek sundimi i ligjit, në rrugëtimin e Kosovës drejt Bashkimit Evropian, luftimi i korrupsionit dhe krimit të organizuar duhet të jenë fusha kyçe ku vlerësohemi për maturitetin evropian.

Ai ka falënderuar institutin ‘’Epik’’ dhe  GIZ për ftesën dhe organizimin e kësaj tryeze, ku ishin pjesëmarrës dhe Ambasadori i Gjermanisë, Jörn Rohde, Ambasadori i Republikës së Çekisë, Pavel Bilek, përfaqësues të zyrës së BE-së në Kosovë, anëtarë të komisionit parlamentar për Integrim Evropian dhe pjesëmarrës nga shoqëria civile. /Telegrafi/