Bekteshi: Mbështetja financiare e BE-së për krizën energjetike prej 80 milionë eurosh do të arrijë në fillim të shkurtit

Ministri i Ekonomisë, Kreshnik Bekteshi, sot në Bruksel ka zhvilluar një takim dypalësh me Komisioneren Evropiane për Energjetik të Bashkimit Evropian, Kadri Simson, përcjell Telegrafi Maqedoni.

Në takim morën pjesë sekretarja shtetërore në Sekretariatin për Çështje Evropiane, Drita Abdiu-Halili dhe ambasadori i misionit të Maqedonisë në BE, Zulfi Ismaili.

Tema kryesore e takimit ishte mbështetja që Bashkimi Evropian i jep Maqedonisë së Veriut për përballjen me krizën energjetike, si dhe masat e marra nga vendi ynë në fushën e sigurisë së furnizimit me energji, si dhe në rritjen e pavarësisë nga gazi i Rusisë.

Ministri Bekteshi falënderoi Bashkimin Evropian për mbështetjen financiare prej 80 milionë eurosh për përballimin e krizës energjetike, që i është dhënë Maqedonisë së Veriut.

Kësti i parë prej 72 milionë eurosh ose 90% e mbështetjes financiare pritet të paguhet jo më vonë se javën e parë të shkurtit dhe siç njofton ministri Bekteshi, këto para janë të destinuara për masat në mbështetje të familjeve dhe konsumatorëve të vegjël për t’u përballur me krizë energjetike.

Disa nga masat e parashikuara me këto fonde, siç tha Bekteshi, synojnë subvencionimin e qytetarëve për faturat e energjisë elektrike, mbështetjen e kompanive të vogla dhe të mesme për të ruajtur vazhdimësinë e biznesit, si dhe investimet shtetërore për tranzicionin e energjisë, burimet e rinovueshme të energjisë dhe efikasitetin e energjisë./Telegrafi/