Beçev: Në Maqedoni ka mundësi për skenarin grek

Sa më tepër zgjat kriza në Maqedoni, aq më të mëdha janë gjasat për skenarin grek apo spanjoll, thotë për Radio Evropa e Lirë, Dimitar Beçev, hulumtues nga Qendra evropiane për politikë, transmeton Telegrafi Maqedoni.

„Në Maqedoni mbretëron pakënaqësi e madhe nga të gjithë partitë, jo vetëm nga VMRO-DPMNE e Gruevskit por edhe nga paraardhësit e tij. Para dy vitesh shpërthyen protestat studentore. Në përgjithësi të rinjtë janë të pakënaqur nga politikanët, përfshi edhe ato të opozitës.

Janë duke u shfaqur grupe të reja të majta të cilat konsiderojnë që LSDM është problem i njëjtë gati sa edhe Gruevski. Në rrjetet sociale mund të shihet se zërat e tillë janë gjithnjë e më të shumtë“, shton Beçev, përndryshe autori i më tepër librave.

I pyetur se cila është prapavija e krizës në Maqedoni dhe përse autoritetet nuk e respektojnë marrëveshjen e arritur me opozitën me ndërmjetësim të BE, Beçev konsideron se në këtë rast Qeveria dhe ish kryeministri Nikola Gruevski para së gjithash janë përgjegjës sepse nuk i respektojnë obligimet e marra. Për shembull, thotë ai, amnistia e përgjegjësve në aferën e përgjimeve të cilën e bëri presidenti Ivanov, gjithsesi që nuk ka qenë e paraparë me Marrëveshjen e Përzhinos për organizim të zgjedhjeve të parakohshme. Domethënë Gruevski përpiqet ta shfrytëzojë procesin të cilin e ndërmjetëson BE, duke u pajtuar me disa koncesione siç është ndarja e pushtetit në një periudhë kalimtare, por bën lojë me aktorët tjerë politik. Nuk i respekton rregullat e lojës të cilët i ka pranuar vetë dhe prandaj lindën protestat, komenton Beçev./Telegrafi/