Ballkani ka shënuar fitore të rëndësishme në xhiron e 23-të të BKT Superligës së Kosovës në futboll.
Suharekasit mposhtën Llapin në derbin e javës, me rezultat minimal 1-0, falë golit të realizuar 15 minuta para fundit të ndeshjes nga Ermal Krasniqi.
Pas ndeshjes, kryetrajneri i Llapit, Tahir Batatina, tha se nuk e kishin merituar humbjen dhe se golin e pranuar ia dhuruan vet ata skuadrës së Ballkanit.
Trajneri llapjan kritikoi lojën e Ballkanit duke thënë se suharekasit me këtë nuk mund të bëhen kampion.
"Ne s'kemi qenë sot në ditën tonë, Ballkani krijoi golin që ne ia krijuam vet", tha fillimisht Batatina.
"Vështirë është me u bo Ballkani kampion pa asnjë aksion, asnjë goditje në portë. Kampionati është i gjatë, dhe është larg për t’u vendos diçka. Mendoj që se merituam humbjen sot. Ballkani vetëm futboll nuk bëri sot. Nuk shënuam gola por e kemi sulmin më të mirë në Superligë”, tha Batatina.
Ballkani me këtë fitore mbetet lider në elitën e futbollit kosovar, me 48 pikë të mbledhura. Llapi, në anën tjetër, ka 39 pikë dhe mbetet në pozitën e katërt në tabelë. /Telegrafi/
