Shota Baraliu: Në një koncert tallava dalin 20 mijë veta, për faturat e rrymës nuk protestojnë as tre veta

Aktorja Shota Baraliu ka thënë se çdo popull e meriton qeverinë që ka, pasi populli në Kosovë nuk proteston për gjera të rëndësishme.

Baraliu në emisionin “Debat Plus” me Ermal Pandurin në RTV Dukagjini ka thënë se është e palogjikshme sepse nëse mbahet një koncert tallava, mblidhen 20 mijë veta ndërsa për faturat e rrymës nuk dalin as tre veta.

“Mendoj që ka faj edhe populli. Nëse mbahet një koncert tallava mblidhen 20 mijë veta, ndërsa nëse mbahet një protestë për rrymën apo diçka tjetër nuk i mbledh as tre veta. Fajin e ka populli që nuk del të protestoj e të ngrejë zërin”.

Lexo po ashtu Petrovci: Fëmijët dikur njihnin pak politikanë e shumë artist, sot njohin vetëm këngëtarët e tallavasë (Video)

Përndryshe, aktorja shtoi edhe se do dëshironte pa masë që liberalizimi i vizave të bëhej sa më shpejtë, duke ditur dëshirën e të rinjve për të vizituar vendet e Evropës.

Ndërsa një dëshirë krejt të kundërt e pati aktori tjetër i ftuar në studio, Jeton Zogjani, i cili tha se është kundër liberalizimit të vizave, pasi sipas tij prioritet duhet t’i jepet mirëqenies sociale.

Ndërkohë që keqardhje për mos-liberalizimin e vizave shprehur edhe aktori i mirënjohur, Enver Petrovci, i cili u shpreh se të rinjtë e vendit fatkeqësisht kanë mundësinë të vizitojnë vetëm vendet e rajonit. /Telegrafi/

Aktorja ka thënë se gjendja e artit në Kosovë është shumë e vështirë, dhe është e kuptueshme që një pjesë e artistëve vrapojnë pas politikanëve.

“Artistët duan të hanë bukë, prandaj nuk kanë qare po vrapuar pas politikanëve. Unë jam beqare dhe mund të mbajë vetën. Por ka artistë që kanë familje dhe kanë fëmijë për të rritur dhe duhet t’u japin bukë, prandaj duhet të vrapojnë pas politikanëve”.

Baraliu thotë se ka artistë që janë lëpirës, por thotë se vet ajo nuk vrapon pas politikanëve.

“Nuk është në karakterin tim të vrapoj mbrapa politikanëve. Por nuk i dihet ndoshta na vjen dita edhe neve”, thotë ndër të tjera Shota Baraliu./Telegrafi/