Barack Obama ka qenë njëri nga presidentët më të dashur nga populli amerikan, pasi ishte i pari i shtetit më të fuqishëm në botë për tetë vite, nga 2009 deri më 2017.
Ish-presidenti amerikan njihet edhe si një adhurues i madh i sportit, në veçanti basketbollit ku shpesh herë shikonte ndeshjet e NBA.
Tani Obama mund të bëhet pronar i një klubi basketbolli, pasi po synon blerjen e skuadrës Phoenix Suns.
Klubi nga shteti i Arizonës është vënë në epiqendër të kritikave kohët e fundi për shkak të pronarit aktual, Robert Sarver, i cili është akuzuar dhe dënuar për histori racizmi, seksizmi e ngacmimesh seksuale.
Ai është dënuar me një gjobë prej 10 milionë dollarësh për ngjarje të tilla si dhe u pezullua një vit në ushtrimin e funksioneve të tij në krye të klubit, duke çuar në vendimin për shitjen e klubit.
Ka qenë gazetari i njohur Bill Simmons që ka dhënë lajmin se Obama është gati për ta blerë skuadrën amerikane.
Sipas gazetarit amerikan, ish-presidenti Obama është në kreun e një grupi investitorësh të rëndësishëm që janë gati të shpenzojnë miliarda dollarë për të blerë Phoenix Suns.
Simmons nuk ka treguar se kush janë personat që po mbështetnin financiarisht Obaman për të realizuar këtë blerje të bujshme, por pritet që ajo të jetë më e rëndësishmja ekonomikisht në historinë e sportit në SHBA.
Mendohet se paketa financiare e blerjes së aksioneve nga grupi që ka si figurë përfaqësuese ish-presidentin e SHBA të arrijë në katër miliardë dollarë.
Obama do të ndeshet me një konkurrencë të ashpër për blerjen e klubit të NBA, pasi edhe pronari i Amazon, miliarderi Jeff Bezos, është gjithashtu i interesuar.
Në fakt, Obama është një tifoz i zjarrtë i Chicago Bulls, ndaj zgjedhja e presidentit të 44-t të SHBA për të investuar te Phoenix Suns duket tejet interesante. /Telegrafi/