Baily: Ju kemi përkrahur që nga pavarësimi, akuzat se ShBA-të e destabilizojnë Maqedoninë nuk mbajnë

Ambasadori amerikan Jess Baily përmes faqes së tij në Facebook ka porositur “ShBA e mbështesin sundimin e ligjit dhe PSP, por nuk ndërhyjnë në punët e brendshme të institucioneve të Maqedonisë“, transmeton Telegrafi Maqedoni.

„Edhe ne në ambasadë nëpër media dëgjojmë shumë rrëfime konspiracioni për përfshirjen tonë në punët e brendshme të Maqedonisë, si dhe akuza se kinse dëshirojmë ta destabilizojmë vendin. Si edhe shumica e qytetarëve të Maqedonisë, edhe ne konsiderojmë se spekulimet e këtilla janë absurde”, thuhet në reagim.

“ShBA në 15 vitet e fundit ka investuar mbi 55 milionë dollarë në sferën e sundimit të së drejtës dhe gjyqësisë në Maqedoni. Më tepër se 600 gjykatës nga Gjykatat e Maqedonisë dhe prokurorë publik kanë qenë pjesë e programeve të ndryshme për përkrahje dhe kualifikim plotësues”.

“Megjithatë, kriza aktuale politike dhe gjetjet për keqpërdorime serioze nga ana e funksionarëve të lartë shtetëror kanë hapur dyshime për keqpërdorime edhe në gjyqësi dhe ndikim të madh ndaj pushtetit gjyqësor. Si përgjigje ndaj kësaj, liderët e katër partive më të mëdha në Maqedoni u pajtuan dhe në Kuvend u krijua një institucion i ri i pavarur – Prokuroria Speciale Publike”, ka sqaruar Baily.

“ShBA konsiderojnë se këto janë momente kyçe, PSP ka rol kyç në vendosjen e përgjegjësisë juridike dhe në këtë drejtim ShBA e përkrahin punën e PSP, përmes sigurimit të ndihmës teknike dhe trajnimeve, si edhe deri më tani kemi punuar me institucionet tjera nga gjyqësia dhe policia që nga pavarësia e Maqedonisë”, ka porositur Bayli përmes Facebook./Telegrafi/