Babai dhe gjashtë fëmijët e rritur jetuan për nëntë vjet në një bodrum në Holandë – u zbuluan pasi njëri prej tyre arriti të arratisej

Policia holandeze ka gjetur një baba dhe gjashtë fëmijët e tij të rritur që jetonin në bodrumin e një shtëpie të izoluar, pasi njëri prej tyre shpëtoi dhe lajmëroi autoritetet.

Sipas mediave të huaja, përcjell Telegrafi, njëri prej tyre, i cili e identifikoi veten si djali më i madh, tha se shpëtoi nga bodrumi dhe shkoi në një bar në fshatin e afërt të Ruinerwold.

Pronari i lokalit, Chris Westerbeek, kujtoi se 25-vjeçari erdhi në shumë raste gjatë disa ditësh dhe dukej ‘i hutuar’.

Westerbeek tha që ai u kthye të dielën dhe piu pesë birra.

“Pastaj unë bëra një bisedë me të dhe ai më tha që kishte ikur dhe kishte nevojë për ndihmë. Pastaj kemi thirrur policinë”, citohet të ketë thënë Westerbeek për RTVDrenthe.

Ai tha që burri, mjekra e të cilit ishte ‘e pisët’ dhe flokët gjithashtu të pakrehura, tha që ai kishte qenë brenda nëntë vjet dhe se ai dëshironte të mbaronte mënyrën se si po jetonte familja e tij.

Sipas tij, që të gjithë fëmijët ishin midis moshës 16-25 vjeç.

Westerbeek kontaktoi policinë që kontrolloi fermën dhe gjeti një shkallë të fshehur poshtë në bodrum pas një dollapi në dhomën e ndenjes.

Kur policia zbriti poshtë shkallëve, ata gjetën një burrë 58-vjeçar, i shtrirë në shtrat.

Burri, i cili është identifikuar të jetë babai, thuhet se ka vuajtur nga një goditje në tru disa vite më parë. Burri u arrestua më vonë për dështimin për të ndihmuar policinë në hetimin e tyre.

Policia nuk ka konfirmuar ende marrëdhëniet midis të rriturve në pronë, ndërsa një fqinj ka thënë se ata menduan se babai jetonte atje vetëm.

Fëmijët e rritur nuk ishin regjistruar nga asnjë autoritet lokale dhe nuk dihet ende asgjë as për nënën e tyre.

Gjatë kontrollit, familjarët u dërguan nga prona në një park rekreativ ndërsa autoritetet kontrolluan për rreziqe nga zjarri dhe sigurinë. /Telegrafi/