Azemi i LDK-së për Manastirin e Deçanit: Sot ra edhe një kauzë e rrejshme e Albin Kurtit

Kryetari i Lidhjes Demokratike të Kosovës në Ferizaj, Visar Azemi, ka shprehur pakënaqësi të madhe pas veprimit të fundit të Qeverisë së Albin Kurtit lidhur me Manastirin e Deçanit.

Në një deklaratë në Facebook, Azemi ka kritikuar ashprisht vendimin e Qeverisë për të urdhëruar Agjencinë Kadastrale që të regjistrojë pronën në emër të Manastirit të Deçanit.

“Edhe një kauzë e rrejshme e Albin Kurtit ra,” tha Azemi, i cili shton se kryeministri Kurti ka vepruar në mënyrë të kundërt me atë që ai propagandonte kur ishte opozitar.

Sipas Azemit, Kurti ka treguar se ka urdhëruar regjistrimin kadastral të pronës së Manastirit të Deçanit gjatë mbledhjes së fundit të Qeverisë, duke i injoruar paralajmërimet e mëhershme dhe duke mashtruar qytetarët për të ardhur në pushtet.

“Kurti e dinte mirë se vendimi i Gjykatës Kushtetuese është i detyrueshëm për zbatim, por me vetëdije zgjodhi të mashtronte qytetarët,” u shpreh Azemi.

Ai përshkruan këtë veprim si jo të befasishëm, duke e cilësuar Kurtin si një individ që ka përmbysur premtimet e tij prej 16 vitesh si opozitar.

“Fatkeqësia është se veprimet e tij kanë sjellë dhe po sjellin dëme të mëdha,” thotë ai

Sipas tij, qeverisja e Kurtit do të jetë jo vetëm e dobët, por edhe më e rrezikshmja që Kosova ka njohur në periudhën pasluftë, duke sugjeruar se vendime të tilla do të kenë pasoja afatgjata për shtetin e Kosovës./Telegrafi/