Autoritetet e Shuto Orizares: Testimi për koronavirus do fillojë nesër

Autoritetet e burgut hetues në Shutkë pranojnë për gazetën “Koha” se te një pjesë e të burgosurve ka panik pas vdekjes së një të burgosuri, ndërsa qetësojnë se po bëjnë gjithçka për ta mbajtur nën kontroll situatën dhe shëndetin e të burgosurve.

“Ekziston një panik brenda të burgosurve të cilët janë të tensionuar për shkak të rastit që ndodhi, por që situata është nën kontroll. Presim që kërkesat e një grupi të vogël të revoltuarve të pranohen me shkrim, ndërkohë që njoftojmë se nesër pritet që të bëhet testimi i të burgosurve për virusin dhe më pas të presim rezultatet”, theksojnë nga burgu i Shuto Orizares.

Kjo erdhi si pasojë e grevës së nisur nga ana e të burgosurve brenda këtij burgut të cilët të revoltuar përcollën deri tek gazeta KOHA shqetësimin e tyre lidhur me atë se brenda nuk i kontrollon as mjeku e madje as nuk ka testime e nuk dihet nëse ka ndonjë tjetër të infektuar brenda tyre, pasi një i burgosur ka ndërruar jetë në ditën e fundit të paraburgimit.

Në vend që të lirohej nga paraburgimi pas 30 ditësh në burgun hetues Shuto Orizare, 47-vjeçari E. A. u gjet i vdekur dje.

Testi i vdekjes tregoi se është pozitiv në virusin Korona. Ai u pranua në njësinë e paraburgimit më 8 mars. Nuk kishte ethe, kollë dhe asnjë simptomë tjetër të virusit. Më 30 mars, ai u ankua për dhimbje në zemër, për të cilën mori terapi të përshtatshme. Shoku i tij i dhomës tha që ai kishte shkuar në shtrat një natë më parë pas namazit të mbrëmjes.

“Në mëngjes, kur u ngritën për t’u fal, ai u sëmur. Thirrëm ambulancën, por ajo vetëm deklaroi se kishte vdekur” Trupi u dorëzua për obduksion, pasi ky është protokolli për të gjithë ata që vdesin nëpër burgje. I arrestuari i ndjerë, mësues me profesion, vjen nga zona e Resnës. Djali i tij u arrestua gjithashtu sepse mashtruan dhe dëmtuan blerësit e mollës. Paraburgimi 30 ditor përfundoi në ditën e vdekjes së tij, pas së cilës ai duhej të largohej në shtëpi.

Ndryshe, disa ditë më parë edhe në burgun e Idrizovës ekzistonte një panik i ngjashëm për shkak të vdekjes së një prej të burgosurve aty, i cili më pas megjithatë rezultoi se ishte negativ në virusin korona. (koha.mk)