Australian Open: Favoritët meshkuj

Më poshtë do të gjeni një analizë të bërë nga Reuters rreth pjesëmarrësve favoritë për të fituar turneun e tenisit, Australian Open, që do të zgjatë nga 14 deri më 27 janar.

Roger Federer – numër 1 në listën botërore

Kampioni në fuqi do të ketë fillim të qetë pas një shortit të lehtë për të, në tentim për të fituar titullin e 13-të “Grand Slam”, dhe t’i afrohet në një, rekordit që mbahet nga Pete Sampras. Zvicerani do të fillojë betejën e Australian Open duke u përballur me argjentinasin Diego Hartfield.

Çeku Tomas Berdych, i cili do të tentojë të hakmerret në të tetën e finales ndaj Fernando Gonzales, mund të jetë një sfidë ca më e vështirë për zviceranin. I treti i renditur në tenisin botëror të meshkujve, Novak Djokovic, pritet të jetë kundërshtar i tij në gjysmëfinale.

Rafael Nadal – numër 2 në listën botërore

Spanjolli do të ketë ca probleme që në fillim të turneut, duke pasur përballë bashkëvendësin Carlos Moya si test të vështirë në rundin e katërt. I gjashti i renditur në tenisin botërorë, Andy Roddick, mund ta presë spanjollin në çerekfinale.

Richard Gasquet dhe Andy Murray mund të kenë një përballje në çerekfinale me njëri-tjetrin, në tentim që të zënë vend në gjysmëfinale, përballë të parashikuarit Rafael Nadal.

Novak Djokoviq – numër 3 në listën botërore

Serbi është njëri nga gjashtë tenistët që kanë mposhtur Federerin në vitin 2007 dhe pritet të ketë një fillim të hapur, në luftën për titullin e parë të madh. Ai do të fillojë garën përballë gjermanit Benjamin Becker.

Gjërat do të mund të bëhet më të vështira në rundin e katërt, kur ai do të mund të ketë përballë njërin nga këto tri emra: Marcos Baghdatis, Marat Safin ose Lleyton Hewitt, derisa David Ferrer ose David Nalbandian mund jenë kundërshtarë potencial në çerekfinale. Federer mund të ketë rastin të dalë përballë Djokoviq në gjysmëfinale.

Andy Roddick – numër 6 në listën botërore

Ish numri një i botës, do ta fillojë turneun me disa përballje të lehta, së pari kundër Lukas Dlouhy. Rruga e tij për në tetëshen e fundit duket relativisht e lehtë, por këtu ai pritet të përballet me Rafael Nadal, derisa Gasquet ose Murray, mund të jetë kundërshtari i radhës, nëse amerikani arrin në gjysmëfinale.
/Reuters/