Australia u jep punëtorëve të drejtën “të injorojnë thirrjet dhe e-mailet e shefave, pas orarit të punës”

Australia po zgjeron “reputacionin e tyre” duke u dhënë punonjësve një “të drejtë për t’u shkëputur tërësisht” kur ata janë jashtë orarit të punës.

Sipas mediave të huaja, përcjell Telegrafi, punëtorët australianë fituan të hënën të drejtën ligjore për të injoruar emailet dhe thirrjet telefonike nga shefat jashtë orarit të punës, përveç rasteve kur një gjë e tillë konsiderohet “e paarsyeshme”.

Ligji është përgjigja e Australisë ndaj “sqarimit të kufijve” midis jetës profesionale dhe personale të njerëzve, mes mbështetjes në rritje të punëdhënësve në komunikimet dixhitale dhe popullaritetit të punës në distancë që nga pandemia e shkaktuar nga COVID-19.

Partia Laburiste e qendrës së majtë të Australisë shpreson se masa do të lehtësojë presionin ndaj punëtorëve për të monitoruar telefonin e tyre kur ata supozohet se janë duke pushuar dhe kalojnë kohë me të dashurit e tyre.

Vendet e punës që shkelin rregullat, të cilat do të zbatohen nga gjykata e Komisionit të Punës së Drejtë të vendit, përballen me gjoba deri në 93,900 dollarë australianë (rreth 57,000 euro).

Australia nuk është vendi i parë që prezanton “të drejtën për t’u shkëputur nga puna”.

Në vitin 2017, Franca prezantoi legjislacionin për të mbrojtur punëtorët nga ndëshkimi për mospërgjigje ndaj mesazheve jashtë orarit të punës, ndërsa Gjermania, Italia dhe Kanadaja kanë miratuar masa të ngjashme.

Pavarësisht imazhit të qetë të Australisë, studiuesit, ekspertët dhe avokatët e punës argumentojnë se vendi po përballet me një kulturë në rritje të punës së tepërt.

Vitin e kaluar, punonjësi mesatar australian kryente mesatarisht 5.4 orë punë të papaguar çdo javë, ndërsa ata të moshës 18 deri në 29 vjeç kryenin 7.4 orë punë të pakompensuar, sipas një raporti nga Instituti Australian. /Telegrafi/