Atletico marshon drejt titullit, fiton ndaj Sociedadit

Atletico Madridi ka regjistruar fitore prej 2-1 përballë Real Sociedadit për të arkëtuar pikë të plota në garën për titullin e La Ligas.

Në ndeshjen e zhvilluar në Estadio Wanda Metropolitano, Los Rojiblancos e kryen punën e nevojshme për të rrugëtuar drejt shpalljes kampion të Spanjës.

Vendasit e nisën sfidën në kërkim të golit dhe e zhbllokuan rezultatin në minutën e 16-të përmes Yannick Carrasco, i cili u asistua nga Marcos Llorente.

Shumë shpejt, nikoqirët e dyfishuan epërsinë me golin e Angel Correa (28’) që shënoi falë asistimit nga Luis Suarez.

Në pjesën e dytë, mysafirët e bënë më dramatik fundit duke e ngushtuar rezultatin përmes Igor Zubeldia. Megjithatë, vendasit nuk lejuan befasi deri në fund dhe e ruajtën avantazhin.

Pas kësaj fitoreje, Atletico Madridi ka katër pikë më shumë se Barcelona që ndodhet në vend të dytë dhe pesë më shumë se Real Madridi (që nuk e ka zhvilluar ndeshjen e kësaj xhiroje). Ndërsa kanë mbetur vetëm edhe dy xhiro (gjashtë pikë) deri në fund.

Në ndërkohë, Real Sociedadi do të mbetet në zonën e Ligës së Evropës edhe pas zhvillimit të sfidave tjera nga skuadrat që ndodhen poshtë tyre. /Telegrafi/

https://www.youtube.com/watch?v=GaDcKbhSjCI

https://twitter.com/alexclapham/status/1392584500639637512