Arrestohet 36-vjeçari në Gjakovë, kishte rrëmbyer një grua dhe ishte larguar në drejtim të panjohur

Një 36-vjeçar me inicialet M.U është arrestuar këtë të premte, pasi dyshohet se kishte rrëmbyer një grua dhe ishte larguar në drejtim të panjohur.

Policia njofton se ngjarja ka ndodhur rreth orës 15:20 në rrugën “Yll Morina” në Gjakovë, ndërsa viktima ka pësuar lëndime trupore.

“Sot me datën 15.09.2023 rreth orës 15:20, Stacioni Policor në Gjakovë ka pranuar informatë se një person mashkull i moshës madhore në rrugën ‘Yll Morina’ në Gjakovë kishte tërhequr me forcë një grua nga një taksi dhe e kishte futur në veturën e tij dhe ishte larguar në drejtim të panjohur”, thuhet në njoftimin për media.

“Pa humbur kohë është filluar me mbledhjen e informatave dhe pas një procesi operativ dhe hetimor është arritur të identifikohet dhe të arrestohet i dyshuari me inicialet M.U., mashkull kosovar i lindur në vitin 1987 mbi dyshimin se kishte privuar nga liria viktimën (femër e moshës madhore) dhe i kishte shkaktuar lëndime trupore”.

Viktimës bëhet e ditur se iu është ofruar ndihma mjekësore si dhe është njoftuar prokurori i shtetit me vendimin e të cilit i dyshuari është ndalur në mbajtje si dhe është iniciuar rast “Lëndim i lehtë trupor” dhe “Privimi i kundërligjshëm i lirisë”. /Telegrafi/