Apple jozyrtarisht publikon detajet për iPad Air 2 dhe iPad Mini 3

Apple ka planifikuar që sot gjatë ditës t’i prezantojë modelet e reja të tabletëve iPad, në një ngjarje mediale, në të cilën do të shfaqen modelet iPad Air 2 dhe iPad Mini 3.

Tani me sa duket Apple aksidentalisht i ka publikuar detajet për iPad Mini 3 dhe iPad Air 2, bashkë me përditësimet e iOS 8.1 të cilat do të vijnë edhe në iPad.

Detajet e konfirmona shfaqin një numër të karakteristikave për të cilat tashmë kemi dëgjuar për modelet e reja të iPad nga Apple, ndërsa merret vesh se të dy pajisjet e reja mobile do të shfaqen me një dizajn të ngjashëm me modelet ekzistuese.
Të dyja modelet e reja të iPad Air 2 dhe iPad Mini 3 do të vijnë me sensorin e gjurmëve për gishta, të njohur si TouchID, një specifikë për të cilën është folur tashmë disa javë rresht.

iPad-ët e rinj do të vijnë me kamera të përmirësuara, ndërsa në Air iPad 2 do të jetë edhe Burst Mode për fotografi të shkrepura në sasi, funksion i cili është prezantuar edhe në iPhone 5s.

Në publikimin jozyrtar, Apple konfirmon edhe se tabletët do të vijnë me një procesor të ri, të quajtur Apple A8X, për të cilin fillimisht ishte thënë se do të vijë vetëm me iPad Pro, ndërsa tani thashethemet e fundit kanë sugjeruar se i njëjti do të jetë edhe në iPad Air 2 dhe iPad Mini 3. (Telegrafi)