Njëri ndër zjarrfikësit, i cili e gjeti veten në vendin e ngjarjes së një aksidenti tragjik, përshkroi momentet e fundit të Princeshës Diana.
Xavier Gourmelon zbuloi se princesha ishte e vetëdijshme dhe kishte sytë hapur kur e tërhoqi atë nga vetura e shkatërruar e tipit, Mercedes.
"Ne ishim shumë të afërt me vendin e rrëzimit dhe ekipit tim iu deshtë tre minuta për të arritur deri tek ajo. Princesha kishte një lëndim të vogël në shpatullën e krahut të djathtë, por ishte mirë. Në të nuk kishte pika gjaku. I kapa dorën me qetësi, dhe ajo më pyeti, 'Zoti im, çfarë ndodhi?' I dhashë oksigjen dhe shpejt e nxora nga vetura", thotë ai.
Vetëm pak çaste më vonë, ajo përjetoi sulm në zemër që më vonë i mori jetën 36-vjeçares.
"Unë i masazhova zemrën dhe pas disa sekondave sërish filloi të marrë frymë. Unë u lirova. Sinqerisht mendova se do të mbijetojë, kur e kemi vënë në ambulancë. Më vonë mësova se vdiq në spital. Shumë më ka goditur kjo tragjedi. Tash e kam kuptuar se kishte lëndime të rënda të brendshme. Ajo natë do të mbetet përgjithmonë në kujtesën time", tha ai.
Ai pretendon se të gjithë të pranishmit në skenën e aksidentit nuk e kishte ditur se kush janë të aksidentuarit.
"Nuk kisha asnjë ide se ajo ishte Princesha Diana. Vetëm kur e vënë në autoambulancë, një prej mjekëve më tregoi se kush ishte ajo", thotë Xavier.
Në makinën me Dianën ishte edhe i dashuri i supozuar, Dodi Fayed dhe shoferi, Henri Paul.
" Fayed ishte në gjendje shumë të keqe. Zemra iu ndal në veturë dhe u deklarua e vdekur. Shoferi ishte i vetëdijshëm, por ishte bllokuar në veturë dhe kishte një dëmtim shumë të rëndë në fytyrë", zbuloi ish zjarrfikës për Metro. /Telegrafi/