Llogaria e Yulia Navalnaya në X - dikur Twitter, u pezullua shkurtimisht një ditë pasi ajo përdori platformën për t'u zotuar se do të vazhdojë fushatën e burrit të saj.
Siç raporton BBC, të hënën, ajo postoi një video duke premtuar se do të lufton për një "Rusi të lirë", disa ditë pasi u konfirmua vdekja e Alexei Navalny në një burg rus.
Të martën pasdite, llogaria e saj për pak kohë nuk ishte e qasshme për përdoruesit. Në një deklaratë, X tha se ishte bllokuar "gabimisht" për shkak të një "gabimi" të sistemit, transmeton Telegrafi.
Një postim në llogarinë zyrtare të sigurisë së faqes shkruante: "Mekanizmi mbrojtës i platformës sonë kundër manipulimit dhe postës së padëshiruar gabimisht shënoi @yulia_navalnaya si shkelje të rregullave tona”.
"Ne e futëm sërish në funksion llogarinë sapo u informuam për gabimin dhe do të përditësojmë mbrojtjen", u tha ndwr tjera.
Navalnaya, e cila përgjithësisht mbajti një profil të ulët gjatë fushatës së bashkëshortit të saj të ndjerë, krijoi një llogari në X të hënën.
Në një video-mesazh të postuar të njëjtën ditë, Navalnaya akuzoi autoritetet ruse se prisnin që gjurmët e agjentit nervor vdekjeprurës Novichok të zhdukeshin nga trupi i burrit të saj, përpara se t'ia jepnin familjes së tij. Kremlini tha se akuza ishte e pabazë dhe një hetim për vdekjen e tij po vazhdon.
Llogaria e saj ka mbledhur më shumë se 100,000 ndjekës që kur u krijua. Sipas udhëzimeve të X, llogaritë mund të pezullohen për postim abuzive, ose nëse siguria e një llogarie është në rrezik. /Telegrafi/