Cole Palmer po përballet me një mosmarrëveshje ligjore të pazakontë me një vresht prestigjioz francez, për shkak të përpjekjes së tij për të regjistruar si markë tregtare nofkën e tij të njohur, "Cold Palmer".
Ylli 23-vjeçar i Chelseat, i famshëm për festimin e tij “të ftohtë” pas golave — ku fërkon krahët — aplikoi vitin e kaluar për të mbrojtur jo vetëm pseudonimin, por edhe gjestin që e shoqëron.
Aplikimi i Palmer mbulon një gamë të gjerë produktesh, duke përfshirë veshje, ushqim, artikuj tualeti, lodra, pije dietike dhe madje edhe produkte alkoolike. Pikërisht për këtë arsye, ai tërhoqi vëmendjen e Chateau Palmer, një vresht i famshëm në Bordeaux, verërat e të cilit shiten deri në 890 euro për shishe.
Vreshtaria franceze ka paraqitur një kundërshtim zyrtar ndaj aplikimit të futbollistit, duke argumentuar se përdorimi tregtar i emrit nga Palmer mund të dëmtojë imazhin dhe reputacionin e markës së tyre historike.
Çështja tani pritet të shqyrtohet nga Zyra e Pronësisë Intelektuale e Mbretërisë së Bashkuar, ku të dyja palët do të kenë mundësinë të paraqesin argumentet e tyre përpara se të merret një vendim.
Chateau Palmer, i themeluar në vitin 1814, është një nga emrat më të respektuar në rajonin Margaux dhe njihet për trashëgiminë e tij të gjatë në industrinë e verërave të klasit të lartë.
Ndërkohë, festimi ikonik i Palmer, i parë për herë të parë në dhjetor 2023, në fakt u frymëzua nga ish-shoku i tij i akademisë së Manchester City, Morgan Rogers, i cili e kishte realizuar këtë gjest para tij. /Telegrafi/