Nipërit, arsyeja pse McCartney nuk tymos më marihuanë
Paul McCartney ka thënë se ka kohë që nuk tymos më kanabis, pasi nuk dëshiron të japë shembull të keq për nipërit e tij.
72-vjeçari, i cili ka pesë fëmijë dhe tetë nipër e mbesa, thotë se për herë të fundit ka tymosur “shumë kohë më parë” dhe tani preferon një gotë vere apo një pije margarita, transmeton Top Channel.
“Nuk e bëj më këtë gjë. Pse? E vërteta është se nuk dua të jap shembull për fëmijët dhe nipërit”.
“Është çështje prindërimi. Dhe më parë, kur endesha rrugëve të Londrës, e mbaja larg syve të fëmijëve të mi”, ka thënë ai për Daily Mirror.
Në një rrëfim të mëhershëm, legjenda e “The Beatles” ka treguar se për herë të parë kishte konsumuar marihuanë në vitin 1964, kur ia kishte ofruar Bob Dylan.
Në janar të vitit 1980, McCartney u arrestua në Japoni, pasi policët i gjetën 225 gramë marihuanë në bagazhet e tij. Asokohe, ai kaloi 10 net në një burg të Japonisë, para se të lirohej e të deportohej. /Telegrafi/