Futbolli dhe muzika kanë qenë gjithmonë dy gjuhë universale që bashkojnë njerëzit. Çdo Kampionat Botëror i FIFA-s sjell jo vetëm emocione në fushë, por edhe këngë që mbeten gjatë në kujtesën e tifozëve.
Disa prej tyre janë himne zyrtare, ndërsa të tjera janë bërë aq të famshme sa kanë eklipsuar edhe këngët e zgjedhura nga FIFA.
Nga Gjermania 2006 deri te Botërori i vitit 2026, ja këngët që kanë shoqëruar turneun më të madh të futbollit në botë.
Gjermani 2006 – Shakira hyn në historinë e Botërorit
Edhe pse himni zyrtar i Botërorit 2006 ishte “The Time of Our Lives”, interpretuar nga Il Divo dhe Toni Braxton, shumë tifozë e kujtojnë këtë turne për një tjetër performancë.
Në ceremoninë përmbyllëse para finales mes Italisë dhe Francës në Berlin, Shakira dhe Wyclef Jean performuan “Hips Don't Lie (Bamboo)”, një version i përshtatur i hitit të tyre global. Energjia e performancës dhe popullariteti i jashtëzakonshëm i këngës bënë që ajo të identifikohej nga shumë njerëz si kolona zanore e vërtetë e Botërorit 2006.
Kjo ishte edhe hera e parë që Shakira lidhej drejtpërdrejt me një Kupë Bote, duke nisur një histori që do të vazhdonte për dekada.
Afrika e Jugut 2010 – “Waka Waka”, himni që pushtoi botën
Katër vite më vonë, Shakira u rikthye në skenën e Botërorit me atë që konsiderohet nga shumë tifozë si kënga më e suksesshme në historinë e Kupës së Botës.
“Waka Waka (This Time for Africa)”, në bashkëpunim me grupin Freshlyground, solli ritme afrikane, energji pozitive dhe një mesazh bashkimi. Kënga u bë një fenomen global, duke grumbulluar miliarda dëgjime dhe duke u kthyer në sinonim të Botërorit 2010.
Megjithatë, “Waka Waka” nuk ishte e vetmja këngë që la gjurmë në Botërorin e Afrikës së Jugut. Një tjetër hit i madh ishte “Wavin' Flag” nga K'naan. Fillimisht e publikuar si një këngë me mesazh frymëzues për shpresën dhe lirinë, ajo u bë jashtëzakonisht popullore pasi u përdor në fushatën globale të Coca-Cola-s për Botërorin 2010.
Për shumë tifozë, “Wavin' Flag” dhe “Waka Waka” përfaqësojnë së bashku kolonën zanore të atij turneu historik, duke mbetur ndër këngët më të dashura të lidhura ndonjëherë me Kupën e Botës.
Brazil 2014 – Ritmet latine pushtojnë Botërorin
Botërori i Brazilit solli atmosferën karakteristike të Amerikës Latine. FIFA zgjodhi “We Are One (Ole Ola)” si këngë zyrtare, të interpretuar nga Pitbull, Jennifer Lopez dhe Claudia Leitte.
Megjithatë, edhe këtë herë Shakira arriti të tërhiqte vëmendjen me “La La La (Brazil 2014)”, një këngë që shumë tifozë e konsideruan më të lidhur me frymën e turneut sesa himni zyrtar.
Kështu, për të dytin Botëror radhazi, emri i saj ishte ndër më të përfolurit në aspektin muzikor.
Rusi 2018 – “Live It Up”
Në Botërorin e Rusisë, FIFA prezantoi “Live It Up”, interpretuar nga artistja shqiptare me famë botërore Era Istrefi, Nicky Jam dhe Will Smith.
Kënga kombinonte elemente pop, dance dhe reggaeton, duke reflektuar trendet muzikore të kohës.
Për Kosovën dhe Shqipërinë, pjesëmarrja e Era Istrefit ishte një moment krenarie për shqiptarët anembanë botës me fansat që mezi pritnin që ajo të performonte në kampionat.
Ajo madje pati thyer edhe rrjetin duke publikuar një fotografi nga kampionati duke bërë shqiponjën dykrenare e veshur me ngjyrat e flamurit të Kosovës, verdhë dhe kaltër.
Katar 2022 – Një kolonë zanore me shumë artistë
Ndryshe nga edicionet e mëparshme, FIFA vendosi që Botërori i Katarit të mos kishte vetëm një këngë kryesore.
Turneu u promovua përmes disa këngëve zyrtare, ndër të cilat spikatën “Hayya Hayya (Better Together)” dhe “Dreamers”, e interpretuar nga Jung Kook i BTS në ceremoninë hapëse.
SHBA-a, Kanada dhe Meksikë 2026 – Rikthimi i Shakirës
Botërori i vitit 2026 zhvillohet për herë të parë në tre vende organizatore: Shtetet e Bashkuara, Kanada dhe Meksikë.
Për këtë edicion, Shakira rikthehet edhe një herë në skenën e futbollit botëror me “Dai Dai”, në bashkëpunim me Burna Boy. Kënga ndërthur ritme latine dhe afrikane, duke sjellë një frymë moderne dhe festive për turneun.
Me këtë paraqitje, Shakira forcon edhe më shumë statusin e saj si artistja që lidhet më ngushtë me historinë muzikore të Botërorëve.