Një person është ndaluar nga Prokuroria Themelore në Gjilan, Departamenti Përgjithshëm, si i dyshuar për përfshirje në rastin “Karaçeva”.
Kështu është bërë e ditur përmes një komunikate për medie,ku thuhet se kjo prokurori ka ndaluar të pandehurin V.B., për shkak të dyshimit se ka kryer veprën penale ‘’Organizimi i skemave piramidale dhe bixhozit të paligjshëm’’, të Kodit Penal të Republikës së Kosovës.
“I pandehuri V.B., dyshohet se gjatë vitit 2020, në mënyrë ilegale ka zhvilluar veprimtarinë e lojërave të fatit në kazinon e quajtur ‘’Admiral’’, në fshatin Karaçevë, komuna e Kamenicës”, thuhet në komunikatë.
Sipas njoftimit, i njëjti me vendim të prokurores së rastit gjendet në ndalim 48 orësh dhe ndaj tij brenda afatit ligjor do të kërkohet masa e sigurisë nga Gjykata kompetente në Gjilan. /Telegrafi/