Llapi kthehet te fitorja, triumfon ndaj Ulpianës në udhëtim

Llapi ka arritur të rikthehet te fitoret në kampionat pasi ka fituar në udhëtim te Ulpiana.

Llapjanët kanë triumfuar me rezultat të pastër 0-2 falë një ndeshje shumë të kujdesshme.

Ishte minuta e 36-të e ndeshjes kur mbrojtësi Dardan Jashari shënoi me kokë për t'i dhuruar mysafirëve epërsinë 0-1.

Me këtë rezultat u mbyllën 45 minutat e para të ndeshjes.

Tahir Batatina kishte inkuadruar disa lojtarë të rinj në këtë sfidë, duke ruajtur titullarët për ndeshjen gjysmëfinale të Kupës së Kosovës.

Edhe në pjesën e dytë Llapi luajti më mirë, derisa Festim Alidema në minutën e 77-të shënoi nga distanca për 0-2.

Me këtë fitore Llapi vazhdon të mbetet në pozitën e katërt në tabelë me 44 pikë, derisa Ulpiana mbetet e parafundit në tabelë me 24 sosh. /Telegrafi/