Lakers barazojnë serinë ndaj Houstonit, fitore shprese për Milwaukeen
Los Angeles Lakers kanë marrë fitoren e parë në ndeshjen gjysmëfinale të Konferencës së Perëndimit ndaj Houston Rockets.
Skuadra nga Kalifornia ka triumfuar me tetë pikë diferencë 117:109 për ta barazuar serinë në 1-1.
Çereku i parë dhe i fundit ishte vendimtar në fitoren e Lakers, pasi skuadra e trajnerit Vogel ishte më e mirë në këto dy pjesë (36:20 dhe 27:17).
Anthony Davis ka qenë më meritori për fitoren e Lakers me 34 pikë të shënuara, 10 kërcime e katër asistime.
Me lojë të mirë u dallua edhe LeBron James që shtoi 28 pikë, 11 kërcime e nëntë asistime.
Tek Houston më efikasi ishte James Harden me 27 pikë e shtatë asistime, por që nuk ishin të mjaftueshme për fitoren e dytë.
Fitore shprese ka marrë edhe Milwaukee Bucks përballë Miami Heat.
Bucks u desh të shkojnë në kohën shtesë për ta mposhtur Miamin me tri pikë epërsi 115:118 për ta ngushtuar epërsinë në 1-3.
Khris Middleton me 36 pikë, tetë kërcime e po aq asistime ishte më efikasi tek Bucks, ndërsa u ndihmua edhe nga Giannis Antetokounmpo që shënoi 19 pikë për 11 minuta lojë dhe pastaj u largua si i lënduar.
Gjithsesi Bucks kanë marrë vetëm fitoren e parë në përballje me Heat që kanë tri sosh dhe një fitore i dërgon në finalen e Konferencës. /Telegrafi/Rezultatet:
Miami Heat – Milwaukee Bucks 115:118
LA Lakers – Houston Rockets 117:109