Boerboel është një racë e madhe dhe e fuqishme qensh me origjinë nga Afrika e Jugut, e njohur për guximin dhe instinktin e saj mbrojtës. Edhe pse është shumë besnik dhe i përkushtuar ndaj anëtarëve të familjes, madhësia, forca dhe temperamenti i tij bëjnë që të mos jetë i përshtatshëm për pronarët pa përvojë
Boerboel e ka origjinën që nga shekulli i 17-të, kur kolonët evropianë sollën në Afrikën e Jugut qen të tipit mastif dhe bulldog. Kryqëzimi i atyre racave me qentë vendas krijoi boerboelin e fuqishëm, i cili kishte për detyrë të ruante pronat nga kafshë të rrezikshme si luanët, leopardët dhe babunët. Këta qen njiheshin për forcën, vigjilencën dhe trimërinë e tyre, duke mos u tërhequr kurrë përballë kërcënimeve.
Sot, boerboel ruan ato cilësi, por përveç kësaj është edhe një anëtar i butë dhe besnik i familjes. Federata Amerikane e Kinematografisë (AKC) e njohu racën vetëm në vitin 2015, prandaj jashtë Afrikës së Jugut ajo mbetet ende e rrallë, The Spruce Pets, përcjell Telegrafi.
I fuqishëm, besnik dhe i kujdesshëm ndaj të panjohurve
Boerboel ka një natyrë plot vetëbesim, është shumë besnik dhe mbrojtës. Ai mund të shoqërohet mirë me fëmijët, por për shkak të madhësisë dhe forcës së tij, ndërveprimi me fëmijët e vegjël duhet gjithmonë të mbikëqyret. Është i kujdesshëm ndaj të huajve dhe shpesh mosbesues ndaj qenve të tjerë. Është inteligjent dhe mëson shpejt, por mund të jetë kokëfortë, ndaj është e rëndësishme që edukimi i tij të jetë i qëndrueshëm dhe me rregulla të qarta.
I nevojitet hapësirë, aktivitet dhe qëndrueshmëri
Boerboel nuk është qen për banesë. Ai ka nevojë për hapësirë për të lëvizur, dhe idealisht një oborr të rrethuar. Çdo ditë i duhen të paktën një orë aktivitet – shëtitje, vrapim ose lojë. Për shkak të mundësisë së agresivitetit ndaj qenve të panjohur, parqet për qen nuk janë gjithmonë vendi i duhur për të.
Peliqja e tij është e shkurtër dhe e lëmuar, dhe mirëmbajtja është e thjeshtë: mjafton ta krehësh një herë në javë, dhe më shpesh gjatë periudhave të ndërrimit të qimeve. Larja rekomandohet rreth një herë në muaj. Është e rëndësishme të pastrohen rregullisht veshët, të priten thonjtë dhe të mbahen dhëmbët e pastër.
Stërvitja dhe socializimi duhet të fillojnë që në moshë të vogël. Një boerboel i rritur është i vështirë për t’u riedukuar nëse ka zhvilluar zakone të këqija. Qasja më e mirë është metoda e qëndrueshme dhe pozitive, me shumë shpërblime. Ekspozimi i hershëm ndaj njerëzve, kafshëve dhe mjediseve të ndryshme ndihmon në kontrollin e instinktit të fortë mbrojtës.
Shëndeti dhe ushqimi
Boerboel në përgjithësi është racë e shëndetshme, por mund të jetë i prirur ndaj disa problemeve gjenetike si displazia e ijeve dhe bërrylave, sëmundjet e zemrës dhe çrregullimet e qepallave (ektropion dhe entropion). Kontrolli i rregullt te veterineri është thelbësor për zbulimin e hershëm të problemeve shëndetësore.
Ushqimi duhet të jetë cilësor dhe i përshtatur me moshën dhe nivelin e aktivitetit. Më mirë është që vaktet të ndahen në dy racione në ditë. Mbajtja e peshës trupore të shëndetshme është e rëndësishme për parandalimin e problemeve të kyçeve.
A është boerboel qeni i duhur për ju?
Boerboel është një qen jashtëzakonisht besnik, inteligjent dhe i fuqishëm, por kërkon një pronar me përvojë. Ai ka nevojë për dorë të fortë, por të drejtë, dhe për shumë socializim.
Nëse kërkoni një qen roje që do të jetë njëkohësisht edhe anëtar i përkushtuar i familjes, dhe jeni gati t’i ofroni hapësirë, vëmendje dhe stërvitje, boerboel mund të jetë zgjedhja e përkryer. Por për ata që nuk kanë përvojë me racat e mëdha, më mirë është të mendojnë për një alternativë tjetër.
/Telegrafi/