Juventusi është duke menduar për shkëmbimin e Alex Sandros me Marcelon e Real Madridit në afatin e janarit.
Bianconerët e kanë kërkuar mbrojtësin e majtë edhe gjatë verës, pas transferimit të Cristiano Ronaldo.
Ndërsa Tuttosport raporton se braziliani është në kontakt të vazhdueshëm me CR7 dhe se nuk i ka raportet e mira me trajnerin e Los Blancos, Julen Lopetegui.
Zonja e Vjetër mund të rikthehet me një ofertë shkëmbimi për Marcelon në afatin dimëror, ndërsa gazeta torineze bën të ditur se kjo ide është e pranueshme edhe në qarqet e Madridit.
Në bazë të rregullave të reja të UEFA-s për Ligën e Kampionëve, tre lojtarë të rinj mund të regjistrohen në skuadër për fazën e eliminimit direkt pa kurrfarë kufizimesh.
Kjo do të thotë se të dy lojtarët mund të luajnë në garën evropiane në rast se i ndërrojnë klubet në janar.
Marcelo është pjesë e Real Madridit që nga viti 2006 kur u transferua nga Fluminense, ndërsa Sandro luan te Juventusi nga viti 2015 kur nënshkroi nga Porto. /Telegrafi/