Është përcjellë sot (e shtunë) për në banesën e fundit aktori i humorit Rasim Thaçi, i njohur për publikun e gjerë si Cima.
Në praninë e familjarëve dhe të shumë dashamirëve, humoristit të ndjerë iu dha lamtumira e fundit në fshatin Vukoc të Komunës së Drenasit, që ishte edhe vendi i lindjes së aktorit tashmë të ndjerë.
Gjatë ditës, para Teatrit Kombëtar të Kosovës u bën homazhe në nderim të tij, ku të pranishëm u panë edhe krerët e lartë të shtetit si Kryeministri Albin Kurti, Kryeparlamentari Glauk Konjufca, Ministri i MKRS-së Hajrulla Çeku si dhe deputeti Lumir Abdixhiku, njëherësh kryetar i LDK-së.
Rasim Thaçi u nda nga jeta të premten, pasi nuk i mbijetoi dëmtimeve shëndetësore nga virusi vdekjeprurës, COVID-19.
Ai ndërroi jetë në Qendrën Klinike Universitare të Kosovës, pas një trajtimi disa javor pas diagnostikimit me coronavirus.
Rasim Thaçi - Cima njihet për skeçet e tij shumta humoristike ndër vite, teksa për një kohë mjaft të gjatë ka pasur një karrierë edhe si futbollist i Prishtinës dhe Flamurtarit. /Telegrafi/