E humbi një tjetër trofe me Al-Nassr, Ronaldo nuk merr pjesë në ceremoninë e medaljeve

Cristiano Ronaldo i habiti tifozët duke mos u paraqitur në ceremoninë e ndarjes së medaljeve pas humbjes në finalen e nivelit të dytë të Ligës së Kampionëve të Azisë.

Ronaldo pësoi humbjen e katërt radhazi me fanellën e Al-Nassr në katër finalet që ka luajtur. Është niveli më i ulët i Ligës së Kampionëve në Azi, dhe fituesja është Gamba Osaka, e cila festoi me rezultatin 1-0 në Riad.

Goli i vetëm i ndeshjes për ekipin japonez u shënua nga Deniz Hummet në minutën e 30-të të ndeshjes. Ekipi saudit më pas u përpoq me të gjitha forcat të barazonte dhe të shkonte në kohën shtesë, por dështoi dhe trofeu shkoi në Japoni.

Pas ndeshjes, Ronaldo u filmua dukshëm i dëshpëruar në qendër të fushës. Megjithatë, kur të gjithë lojtarët u larguan për ceremoninë e ndarjes së medaljeve, portugezi u drejtua për në dhomën e zhveshjes.

Me sa duket, veteranit portugez nuk i interesonte medalja e argjendtë në nivelin e dytë të garës në Azi, kështu që nuk donte të merrte pjesë në ceremoninë e medaljeve.

Kështu, Ronaldo mbetet vetëm në një trofe që kur mbërriti në Arabinë Saudite, por as ky trofe nuk llogaritet zyrtarisht sepse është një garë e Kampionëve të Klubeve Arabe që nuk njihet nga FIFA, të cilën Ronaldo e fitoi në vitin 2023.

Trofeu i fundit zyrtar i Ronaldos në futbollin kontinental daton që nga viti 2018, kur ai ndihmoi Real Madridin të fitonte Ligën e Kampionëve gjatë sezonit 2017/18. Ky titull ishte trofeu i pestë i Ligës së Kampionëve në karrierën e tij./Telegrafi/