Ndeshja e fundit e javës së gjashtë në elitën e futbollit kosovar, do të zhvillohet në qytetin e Gjilanit.
Skuadra e inkuadruar në Superligë, Vllaznia e Pozhoranit do të jetë nikoqire e Dritës, në stadiumin e qytetit në Gjilan.
Vllaznia në pesë javët e para ka arkëtuar vetëm tri pikë dhe në ndeshjen ndaj Dritës synon të marrë një rezultat pozitiv.
Ndërkohë gjilanasit kanë dy fitore dhe një barazim, duke kërkuar pikët e plota sot për të mbetur afër liderit Llapit.
Kapiteni i Dritës së Gjilanit, Ardian Limani ka thënë për Telegrafin se synimi i tyre i vetëm për këtë sfidë janë tri pikët.
“E njohim mjaftë mirë kundërshtarin por edhe ata na njohin ne pasi shumica e tyre kanë qenë vitin e kaluar pjesë e Dritës”.
“Gjithsesi ne jemi përgatitur mjaftë mirë për këtë takim pasi është një kundërshtar i vështirë por ne synojmë vetëm tri pikët”, deklaroi Limani.
“Ndeshja me Vllazninë i paraprinë derbit kështu që ne duam fitore që të hyjmë më të motivuar në fushë ndaj Gjilanit”, tha kapiteni i bardh e kaltërve.
Sulmuesi anësor i Vllaznisë, Alban Rexhepi ka deklaruar se synojnë të marrin më të mirën nga ndeshja me Dritën.
“Jemi përgatitur mjaftë mirë për këtë takim. Si ne lojtarët ashtu edhe trajneri e njohim mjaftë mirë Dritën”.
“Synimi ynë është që të luajmë një lojë të bukur dhe të marrim një rezultat pozitiv, pasi kemi përballë një kundërshtar të fortë”, u shpreh Rexhepi për Telegrafin.
Ndeshja mes rivalëve lokal do të zhvillohet me fillim nga ora 16:00 në stadiumin e qytetit në Gjilan.
Ky takim do të drejtohet nga Besfort Kosumi me ndihmësit Besnik Morina dhe Fatmir Abrashi, ndërsa gjyqtari i katërt do të jetë Isak Cereviku. /Telegrafi/