Aktorja amerikane, Courteney Cox, të cilën shumëkush e mban mend si Monica nga kult seriali "Friends", i ka mahnitur fansat me publikimin e një videoje, përmes të cilës tregonte se është kthyer në banesën, e cila në serial ishte e karakterit që ajo e portretizonte.
Teksa qëndronte në udhëkryqin e rrugëve Grove dhe Bedford në West Village, në vendin ku janë xhiruar kuadrot e jashtme të banesës së Monicas, nostalgjikja Courteney e ka shfrytëzuar muzikon nga promoja e serialit, i cili së fundmi është shpallur si më i popullarizuari në histori.
"Natën e mirë, po shkoj në shtëpi", dëgjohet duke thënë aktorja teksa niset drejt ndërtesës, në të cilën mblidheshin yjet e serialit të dikurshëm.
Seriali "Friends" është emetuar për dhjetë sezone në NBC, në periudhën shtator 1994 - maj 2004.
Me vite të tëra ka pasur thashetheme për vazhdimin apo ribërjen e komedisë televizive, mirëpo deri më tani nuk ka ndodhur diçka e tillë. /Telegrafi/