Auterion prezanton Nemyx - platformë për kontrollin e shumë dronëve

Kompania amerikane, Auterion ka prezantuar platformën e re “Nemyx”, një zgjidhje inovative për kontrollin e njëkohshëm dhe të koordinuar të shumë dronëve, e cila është zhvilluar duke u bazuar në përvojën e fituar nga përdorimi real në zonat e konfliktit në Ukrainë.

Platforma Nemyx paraqet një hap të madh përpara në fushën e teknologjisë së dronëve ushtarakë dhe atyre të mbikëqyrjes, duke i dhënë mundësi operatorëve të menaxhojnë në mënyrë të centralizuar tufa të tëra dronësh që mund të jenë nga prodhues të ndryshëm, për aq kohë sa ata janë të pajisur me sistemin operativ AuterionOS. Ky përputhshmëri ndër-platformore ofron fleksibilitet të madh dhe zvogëlon varësinë nga një furnitor i vetëm.

Duke përdorur vizionin kompjuterik (machine vision) dhe algoritme të avancuara të inteligjencës artificiale, Nemyx u mundëson dronëve të komunikojnë mes tyre dhe të marrin vendime në kohë reale. Kjo teknologji e bën të mundur që disa objektiva të identifikohen dhe të goditen njëkohësisht, duke rritur ndjeshëm efikasitetin në fushën e betejës ose gjatë operacioneve të sigurisë.

Në kuadër të një kontrate ekzistuese me autoritetet ukrainase, Auterion planifikon të dorëzojë deri në 33,000 dronë të tipit FPV (First-Person View) deri në fund të këtij viti.

Këta dronë janë të pajisur me kompjuterë të integruar Skynode dhe të operuar përmes AuterionOS, duke i bërë ata plotësisht të përputhshëm me platformën Nemyx dhe të aftë për të funksionuar si pjesë e një rrjeti të koordinuar.

Kjo nismë pritet të përforcojë ndjeshëm kapacitetet taktike të forcave të armatosura ukrainase, duke mundësuar operacione më të zgjuara, më të shpejta dhe më të vështira për t’u ndalur nga kundërshtari. Auterion, me këtë teknologji, pozicionohet si një nga aktorët kryesorë në zhvillimin e mjeteve ajrore pa pilot për përdorim në konflikte moderne dhe në operacione të sigurisë strategjike. /Telegrafi/