Anglia e ka mbyllur me sukses fazën përgatitore para Kupës së Botës, duke triumfuar 3-0 ndaj Kosta Rikës në Orlando në një ndeshje që u dominua pothuajse plotësisht nga skuadra e Thomas Tuchel.
Pavarësisht një vonese prej një ore për shkak të stuhive të forta që goditën qytetin amerikan, anglezët treguan qetësi dhe cilësi në fushë. Declan Rice hapi rezultatin që në fillim të takimit, pasi u shërbye bukur nga Anthony Gordon, duke i dhënë Anglisë epërsinë që në minutat e para.
Kosta Rika, e paraqitur pa gjashtë lojtarë të rëndësishëm, pati vështirësi të mëdha për të ndërtuar aksione dhe rrallëherë arriti të rrezikojë portën angleze. Dominimi i "Tre Luanëve" ishte i dukshëm gjatë gjithë pjesës së parë, ndërsa Jude Bellingham ishte ndër lojtarët më aktivë në organizimin e sulmeve.
Mesfushori i Anglisë krijoi disa raste të mira, përfshirë një pasim perfekt për Noni Madueke, i cili humbi një mundësi të artë duke goditur shtyllën edhe pse kishte portën pothuajse të zbrazët para vetes. Në fund të pjesës së parë, një penallti e akorduar për Anglinë u anulua pas ndërhyrjes së VAR-it.
Në pjesën e dytë, Tuchel bëri disa ndryshime dhe eksperimentoi me Bellinghamin në rolin e sulmuesit qendror. Pikërisht pas një aksioni të tij u fitua penalltia që Anthony Gordon e shndërroi në gol për 2-0 në minutën e 68-të.
Fitorja u vulos në minutën e 87-të nga Ollie Watkins, i cili shfrytëzoi një top të kthyer nga portieri për të shënuar golin e tretë dhe për të konfirmuar epërsinë e anglezëve.
Anthony Gordon dhe Jude Bellingham ishin ndër më të dalluarit në fushë dhe duket se kanë forcuar pozitat e tyre për një vend në formacionin titullar për ndeshjen e parë të Kupës së Botës kundër Kroacisë, e cila do të zhvillohet më 17 qershor në Dallas.
Pas kësaj fitoreje bindëse dhe pa probleme me lëndime, Anglia udhëton drejt kampit të saj bazë në Kansas me besim të lartë dhe me synimin për ta nisur Botërorin në mënyrën më të mirë të mundshme. /Telegrafi/