Alisson Becker i ka falënderuar tifozët e Romës dhe ka thënë se është koha për një aventurë të re, teksa pritet transferimi i tij te Liverpooli.
Klubi anglez ka arritur marrëveshje me Giallorossët që ta blejë brazilianin për 67 milionë funte (75 milionë euro).
Në ndërkohë, portieri duhet të arrijë marrëveshje personale dhe t’i kryejë ekzaminimet mjekësore, para se të finalizohet marrëveshja.
Dhe derisa nuk ka asgjë zyrtare nga klubet, Alisson e ka bërë të qartë se do të largohet nga Roma.
“Dua t’i falënderoj tifozët e Romës. Tash është koha për një aventurë të re”, ka thënë portieri në aeroportin Ciampino të kryeqytetit italian.
25-vjeçari ka qenë fantastik në sezonin 2017/2018 duke joshur interesimin e klubeve të mëdha për shërbimet e tij.
Ai ka qenë portieri startues i Brazilit në Kampionatin Botëror, ku arriti deri në çerekfinale.
Nëse ndodh ky transferim, atëherë do të jetë shitje rekord për një portier. /Telegrafi/