Mbrojtësi i Barcelonës, Jordi Alba, ka thënë se Barcelona është e angazhuar deri në fund për të fituar Ligën e Kampionëve dhe La Ligan në sezonin 2018-19.
Mbrojtësi i majtë spanjoll shënoi golin e fitores 2-1 të Blaugranëve ndaj Real Sociedadit të shtunën në mbrëmje dhe ekipi katalunas ka nevojë vetëm edhe për gjashtë pikë për të konfirmuar mbrojtjen e titullit.
Ata përballen me Alaves dhe Levante në gjashtë ditët e ardhshme, që do të thotë se mund të kenë titullin e konfirmuar përpara gjysmëfinales së Ligës së Kampionëve me Liverpoolin.
30-vjeçari spanjoll ka thënë se ekipi është i fokusuar dhe dëshiron t'i fitojë të gjithë trofetë në këtë sezon.
"Ishte e vështirë kundër Sociedadit, sidomos pas asaj që ne dhamë shumë kundër Manchester Unitedit".
"Por, kjo skuadër dëshiron të jetë kampione - duan të fitojnë të gjithë trofetë".
"E dimë se ne duhet të vazhdojmë të punojmë shumë, të respektojmë kundërshtarët para nesh dhe të mbetemi të përkushtuar", ka thënë Alba. /Telegrafi/