Amazon do t’i hap 100 mijë vende të reja të punës deri në fund të vitit

Kompania Amazon ka njoftuar se deri në fund të vitit do t’i hap 100 mijë vende të reja të punës në Shtetet e Bashkuara të Amerikës dhe Kanada.

Shitësi më i madh online në botë tha se këto vende të punës do të janë me orar të plotë dhe të pjesshëm. Po ashtu, brenda kësaj periudhe do të hapen dhe 100 depo të reja.

Që nga 30 qershori, kompania me qendër në Seattle ka punësuar rreth 880 mijë punëtorë, përjashtuar kontraktorët dhe punëtorët e përkohshëm, përcjell Telegrafi.

Nënpresidentja e Amazonit, Alicia Boler Davis tha se kjo po bëhet për të plotësuar nevojat në rritje të klientëve.

“Ne do të vazhdojmë të vendosim teknologji aty ku është e përshtatshme, duke filluar nga një perspektivë e sigurisë”, tha Davis.

Ajo nuk ka komentuar nëse automatizimi do të thotë më pak punë për depo, por tha se Amazon do të përdor sistemet e saja për të bashkëpunuar me njerëzit.

Në fillim të këtij muaji, Amazon kishte njoftuar se do t’i hap 33 mijë vende të reja të punës për nevojat e saja teknologjike. /Telegrafi/