Aktakuzë ndaj pesë personave për rastin e dhunimit të 11 vjeçares në Prishtinë

Prokuroria Themelore në Prishtinë ka njoftuar se departamenti për të Mitur, pas zhvillimit të hetimeve dhe zgjerimit të tyre, mbledhjes dhe analizimit të provave, të enjten ka ngritur aktakuzë ndaj pesë personave: E.R. dhe Sh.K., (madhorë), si dhe ndaj tre të miturve, të përfshirë në rastin i cili ka ndodhur në muajin gusht të vitit 2022, ndaj 11 vjeçares, të cilët gjenden në paraburgim.

Sipas një njoftimi për media, në aktakuzë bëhet e ditur se i pandehuri E.R., ngarkohet për veprat penale “Shërbimet seksuale të viktimës së trafikimit”, dhe “Trafikimi me njerëz”, ndërsa i pandehuri Sh.K., ngarkohet për veprën penale “Shërbimet seksuale të viktimës së trafikimit”.

“Po ashtu, njëri prej të miturve ngarkohet për veprat penale ‘Dhunimi’, nga neni 227 paragrafi 8 lidhur me paragrafin 7 dhe paragrafin 4 të KPRK-së, ‘Trafikimi me njerëz’, nga neni 165 paragrafi 2 lidhur me paragrafin 1 të KPRK-së dhe ‘Keqpërdorimi i fëmijëve në pornografi’, nga neni 232 par. 1 të KPRK-së. Ndërkaq, dy të miturit e tjerë ngarkohen për veprat penale ‘Dhunimi’,  nga neni 227 paragrafi 8 lidhur me paragrafin 7 dhe paragrafin 4 të KPRK-së, si dhe për veprën penale ‘Keqpërdorimi i fëmijëve në pornografi’, nga neni 232 paragrafi 1 lidhur me paragrafin 2 të KPRK-së”, thuhet në njoftim.

Tutje sipas njoftimit, përveç kësaj, ndaj rastit tjetër penal i cili i takon muajit qershor të këtij viti, kanë njoftuar se është në proces të zhvillimit të hetimeve, duke i dhënë prioritet deri në epilogun përfundimtar të kësaj çështjeje penale. /Telegrafi/